بیٹے نے معمولی رقم کیلئے ماں کا قتل کردیا۔ واردات کے بعد درندہ صفت بیٹا ٹی وی دیکھتے بیٹھ گیا
آندھراپردیش کے ضلع کڑپہ کے پروڈدوٹور میں ایک دل دہلا دینے والا واقعہ پیش آیا، جہاں اکلوتے بیٹے نے معمولی رقم نہ دینے پر اپنی ماں کا بہیمانہ قتل کر دیا۔ یہ واقعہ اتوار کی صبح سری رام نگر کالونی میں پیش آیا، جس نے علاقے میں سنسنی پھیلا دی۔
تفصیلات کے مطابق 52لکشمی دیوی ایک سرکاری اسکول میں ٹیچر تھیں، جبکہ ان کے شوہر وِجیا بھاسکر ریڈی پہلے خانگی ملازمت کرتے تھے مگر اس وقت بے روزگار تھے۔ دونوں کا اکلوتا بیٹا یشونت کمار ریڈی نے تین سال قبل چینئی سے بی ٹیک کی ڈگری مکمل کی تھی اور حیدرآباد میں ملازمت اور فلموں میں مواقع کی تلاش میں مقیم تھا۔
یشونت ہر ماہ ماں سے اپنے کمرے کے کرایے اور دیگر اخراجات کے لیے رقم لیتا تھا۔ پچھلے مہینے ماں نے پیسے نہیں بھیجے تو اس نے فون پر تین ہزار روپے مانگے، جو لکشمی دیوی نے بھیج دیے۔ بعد میں اس نے مزید دس ہزار روپے مانگے، لیکن ماں نے دینے سے انکار کر دیا۔ اسی بات پر برہم ہو کر وہ اتوار کی صبح بغیر اطلاع کے حیدرآباد سے پروڈدوٹور پہنچ گیا۔
گھر آتے ہی اس نے ماں سے جھگڑا کیا اور اُس پر حملہ کر دیا۔ شور سن کر والد وِجیا بھاسکر ریڈی بیڈروم سے باہر آنے لگے تو یشونت نے اُنہیں اندر دھکیل کر کمرہ بند کر دیا۔ کچھ دیر بعد اس نے چاقو سے اپنی ماں کا گلا کاٹ دیا اور لاش کو گھسیٹ کر صحن میں ڈال دیا۔
قتل کے بعد ملزم نے دروازہ بند کیا، ٹی وی آن کر کے گانے دیکھتا رہا۔ ماں کی چیخیں سن کر مقامی لوگ گھر کے باہر جمع ہوگئے اور پولیس کو اطلاع دی۔ پولیس نے موقع پر پہنچ کر یشونت کمار ریڈی کو گرفتار کر لیا اور باپ کو کمرے سے باہر نکالا۔
تھانہ انچارج وینو گوپال کے مطابق ملزم کے خلاف قتل کا مقدمہ درج کر کے تفتیش شروع کر دی گئی ہے۔
