کویت میں جنگ کا خطرہ منڈلانے لگا، میزائل اور ڈرون حملوں پر سائرن گونج اٹھے
کویت سٹی: مشرقِ وسطیٰ میں بڑھتی ہوئی کشیدگی کے درمیان کویتی فوج نے پیر کے روز ملک پر ہونے والے میزائل اور ڈرون حملوں کو ناکام بنانے کا دعویٰ کیا ہے۔ حملوں کے خدشے کے پیش نظر ملک بھر میں خطرے کے سائرن بجائے گئے، جس سے عوام میں تشویش کی لہر دوڑ گئی۔
کویتی فوج کے جنرل اسٹاف نے بیان میں کہا کہ فضائی دفاعی نظام دشمن کے میزائلوں اور ڈرونز کو تباہ کرنے میں مصروف ہے۔ فوج نے شہریوں کو خبردار کیا کہ اگر دھماکوں کی آوازیں سنائی دیں تو وہ دراصل فضائی دفاعی نظام کی جانب سے حملوں کو ناکام بنانے کی کارروائی کا نتیجہ ہوں گی۔
دوسری جانب امریکی سینٹرل کمانڈ (CENTCOM) نے اعلان کیا ہے کہ اس نے گزشتہ ہفتے ایران کے فضائی دفاعی مراکز، زمینی کنٹرول اسٹیشن اور ڈرون تنصیبات پر حملے کیے۔ امریکہ کا کہنا ہے کہ یہ کارروائی ایران کی جانب سے امریکی MQ-1 ڈرون مار گرائے جانے کے جواب میں کی گئی۔
ادھر اسرائیلی فوج نے جنوبی لبنان میں اپنی پیش قدمی مزید تیز کر دی ہے۔ اسرائیلی وزیراعظم نتن یاہو نے فوج کو لبنان میں مزید آگے بڑھنے کا حکم دیا ہے۔ اسرائیلی فوج نے جنوبی لبنان کے ایک اہم تزویراتی قلعے پر قبضہ بھی کر لیا ہے، جسے حالیہ تنازع میں اہم پیش رفت قرار دیا جا رہا ہے۔
سفارتی محاذ پر امریکی وزیر خارجہ Marco Rubio نے لبنان کے صدر Joseph Aoun اور نیتن یاہو سے الگ الگ بات چیت کی۔ امریکہ نے اسرائیل اور لبنان کے درمیان نئی جنگ بندی کی تجویز پیش کرتے ہوئے مطالبہ کیا ہے کہ حزب اللہ پہلے اسرائیل پر حملے بند کرے، جس کے بدلے اسرائیل بیروت میں فوجی کارروائیوں میں اضافہ نہیں کرے گا۔
دریں اثنا ایران اور امریکہ کے درمیان جوہری مذاکرات تعطل کا شکار ہونے کے باوجود رابطے جاری ہیں۔ ایرانی وزیر خارجہ عباس نے کہا ہے کہ تہران اور واشنگٹن کے درمیان بات چیت اور پیغامات کا تبادلہ اب بھی جاری ہے۔ تاہم امریکی صدر ڈونالڈ ٹرمپ نے ایران کے جوہری پروگرام اور آبنائے ہرمز کے معاملے پر مزید سخت شرائط عائد کرنے کا عندیہ دیا ہے۔
