ٹرمپ نے چین سے آبنائے ہرمز کی حفاظت کی اپیل کی ، بیجنگ کا دوٹوک جواب: پہلے جنگ بند کریں
ایران جنگ کے باعث متاثر ہونے والی آبنائے ہرمز کو محفوظ رکھنے اور تیل کی ترسیل کو منظم کرنے کے لئے امریکی صدر ڈونالڈ ٹرمپ نے کئی ممالک سے تعاون کی اپیل کی ہے۔ اس معاملے پر چین نے ردعمل دیتے ہوئے اہم بیان دیا ہے۔
چین کی وزارت خارجہ کے ترجمان لن جیان نے کہا کہ اگر چین کو آبنائے ہرمز کے تحفظ کے لئے آگے آنا ہے تو سب سے پہلے مغربی ایشیا میں جاری فوجی سرگرمیوں کو فوری طور پر بند کیا جانا چاہئے۔ انہوں نے کہا کہ موجودہ جھڑپوں کی وجہ سے عالمی سطح پر توانائی کی ترسیل، علاقائی امن اور عالمی استحکام متاثر ہو رہے ہیں۔
لن جیان نے امریکہ کو مشورہ دیا کہ کشیدگی میں مزید اضافہ نہ ہونے دینے کے لئے فوری اقدامات کئے جائیں۔ انہوں نے کہا کہ موجودہ تنازعات ختم ہونے کی صورت میں ہی خطے میں استحکام ممکن ہے۔
ادھر امریکی صدر ڈونالڈ ٹرمپ نے اتوار کے روز ایئر فورس ون طیارے میں میڈیا سے گفتگو کرتے ہوئے کہا کہ آبنائے ہرمز کے علاقے میں چین کے مفادات زیادہ ہیں، اس لئے بیجنگ کو اس اہم آبی گزرگاہ کے تحفظ کے لئے آگے آنا چاہئے۔ انہوں نے کہا کہ چین کے جواب کے بعد ہی وہ اس ماہ کے آخر میں مجوزہ بیجنگ دورے پر جانے یا اسے ملتوی کرنے کا فیصلہ کریں گے۔
