ملک میں سب زیادہ وقت تک پنشن لینے والے شخص بویت رام دودی انتقال کر گئے

جے پور _ یکم فروری ( اردو لیکس) ملک میں سب سے زیادہ وقت تک پنشن لینے والے شخص  کے طور پر ریکارڈ بنانے والے بویت رام دودی  انتقال کر گئے۔راجستھان کے علاقے جھنجھنو، کے سابق فوجی بویت رام  کا پیر کو انتقال ہو گیا۔ ان کی عمر 100 سال تھی انہوں نے آزادی سے قبل برٹش انڈین آرمی میں خدمات انجام دیں اور 66 سال سے زائد عرصے تک پنشن حاصل کی۔ بویت رام نے 17 سال کی عمر میں فوج میں شمولیت اختیار کی۔ دوسری جنگ عظیم کے دوران لیبیا اور افریقہ میں کام کیا۔

تاہم، وہ ہندوستان کی آزادی کے دس سال بعد 1957 میں فوج سے ریٹائرڈ ہوئے۔ تب سے وہ ہر ماہ پنشن وصول کر رہے ہیں۔ پنشن، جو 1957 میں 19 روپے سے شروع ہوئی تھی، ان کی موت تک 35,640 روپے تک پہنچ گئی۔ اب ان کی اہلیہ چندا دیوی سائنا (92) کو اپنی زندگی تک پنشن ملے گی۔