ہیڈ کانسٹیبل طالب شیخ کی بیوی اور بیٹی کا بہیمانہ قتل _ برہم ہجوم نے ملزم کے مکان اور گاڑیوں کو آگ لگا دی

نئی دہلی _ 15 اکتوبر ( اردولیکس ڈیسک) چھتیس گڑھ کے سورج پور ضلع میں ہیڈ کانسٹیبل طالب شیخ کی بیوی اور بیٹی کو تلوار سے قتل کر دیا گیا۔ ملزم کا نام کلدیپ ساہو ہے۔ واقعہ سے مشتعل لوگوں نے کلدیپ ساہو کے گھر اور گودام کے باہر کھڑی گاڑیوں کو آگ لگا دی۔ ملزم کی گرفتاری کے مطالبے پر بھیڑ مشتعل ہوگئی اور کافی احتجاج کیا یہ واقعہ پیر کو پیش آیا ۔

 

 

بتایا گیا ہے کہ ہیڈ  کانسٹیبل طالب شیخ  دراصل، ایک کیس کے سلسلے میں  دیگر پولیس اہلکاروں کے ساتھ کلدیپ ساہو کو پکڑنے گئے تھے، لیکن وہ فرار ہو گیا۔ اس کے دو دن  بعد کلدیپ نے طالب شیخ کے گھر میں گھس کر ان کی بیوی مہناز فیض اور بیٹی عالیہ شیخ کو تلوار سے قتل کر دیا۔ اور دونوں ماں اور بیٹی کی نعشیں ان کے گھر سے تقریباً 5 کلومیٹر دور نہر کے پاس کھیت میں پھینک دیا۔ دونوں کی نعشیں نیم برہنہ حالت میں ملیں۔

 

آج دوسرے دن منگل کو  پولیس نے سورج پور ڈبل مرڈر کیس کے مرکزی ملزم کلدیپ ساہو کو بلرام پور سے گرفتار کر لیا ہے۔ موصولہ اطلاعات کے مطابق ملزم بس کے ذریعے جھارکھنڈ جا رہا تھا، مگر راستے میں پولیس نے اسے گرفتار کر لیا۔

 

سورج پور ڈبل مرڈر کیس میں چونکا دینے والے حقائق سامنے آئے ہیں۔ بتایا جاتا ہے کہ ملزم کلدیپ کئی سالوں تک پولیس کے قریب رہا ہے۔ اس کے جرائم اور مجرمانہ سرگرمیوں کی وجہ سے اسے ضلع سے  تڑی پار کا حکم دیا گیا تھا،اس کے باوجود پولیس افسران کی ملی بھگت کے سبب ملزم اپنے گھر ہی رہ رہا تھا۔

 

یہ بھی معلوم ہوا کہ  ملزم کا گھڑ پولیس اسٹیشن کے بالکل قریب واقع ہے۔ اسٹیشن کے اتنا قریب ہونے کے باوجود پولیس نے اس بات پر دھیان نہیں دیا کہ ضلع تڑی پار کا ملزم اپنے گھر میں رہائش پذیر ہے۔

 

سورج پور میں ہیڈ کانسٹیبل طالب شیخ کی بیوی اور بیٹی کے قتل کے معاملے میں فرار ملزم کلدیپ ساہو کے ساتھ دیگر افراد کے ملوث ہونے کا بھی شبہ ظاہر کیا جا رہا ہے۔ پولیس نے شک کی بنیاد پر کلدیپ کے کچھ ساتھیوں کو حراست میں لیا ہے اور ان سے پوچھ گچھ جاری ہے۔

 

ملزم کی گرفتاری کے لیے کئی اضلاع کے سینئر افسران کو سورج پور بلایا گیا۔ دیر شام کو پولیس آئی جی، ایس پی، اور کلکٹر کی قیادت میں شہر کے مرکزی راستوں پر فلیگ مارچ کیا گیا، جس سے سیکورٹی کی صورتحال کو مزید سخت کر دیا گیا۔

 

قتل کے بعد دونوں نعشوں کو ان کے آبائی گاؤں منیندرگڑھ لایا گیا، جہاں سے آج صبح ٹی وی ٹاور روڈ پر واقع رہائش گاہ سے تدفین کی ادائیگی کے لیے جلوس جنازہ نکالا گیا۔ ایس پی نے بھی میت کو کندھا دیا اور دونوں کو موہار پارہ کے قبرستان میں سپردِ خاک کیا گیا۔