ہتک عزت کے مقدمہ میں راہول گاندھی کو بمبئی ہائی کورٹ سے ملی بڑی راحت

ممبئی _ 12 جولائی ( اردولیکس ڈیسک) بمبئی ہائی کورٹ نے جمعہ کو بھیونڈی کی عدالت کے اس حکم کو منسوخ کر دیا جس میں راشٹریہ سویم سیوک سنگھ (آر ایس ایس) کے ایک کارکن کی طرف سے راہول گاندھی کے خلاف دائر مجرمانہ ہتک عزت کے مقدمے میں ثبوت کے طور پر کچھ اضافی دستاویزات کی اجازت دی گئی تھی

بمبئی ہائی کورٹ کے جج ۔جسٹس پرتھوی راج کے چوان نے راہول گاندھی کی طرف سے دائر درخواست میں یہ حکم دیا جس میں الزام لگایا گیا تھا کہ ٹرائل کورٹ نے آر ایس ایس کے کارکن راجیش کنٹے کو کچھ دستاویزات پیش کرنے کی اجازت دی تھی۔ بھیونڈی مجسٹریٹ عدالت نے 3 جون کو راجیش کنٹے کے ذریعہ جمع کرائے گئے کچھ دستاویزات کو ریکارڈ پر لیا تھا جو راہول گاندھی کے خلاف مقدمہ میں شکایت کنندہ ہیں۔مجسٹریٹ عدالت نے بطور ثبوت مبینہ ہتک آمیز تقریر کی نقل کی اجازت دی تھی جس کی بنیاد پر ہتک عزت کا مقدمہ دائر کیا گیا تھا۔

راہول گاندھی نے اسے ہائی کورٹ میں اس بنیاد پر چیلنج کیا کہ مجسٹریٹ کا حکم  راجیش کنٹے کی طرف سے دائر ایک اور درخواست میں ہائی کورٹ کے ایک جج کے حکم کی خلاف ورزی ہے جس میں ہتک عزت کی اسی شکایت سے متعلق تھا۔