راجیہ سبھا انتخابات: کانگریس نے 5 ریاستوں سے 7امیدواروں کا اعلان کر دیا ؛ منصور علی خان بھی شامل
حیدراباد : کانگریس پارٹی نے 18 جون کو ہونے والے راجیہ سبھا انتخابات کے لیے پانچ ریاستوں سے اپنے سات امیدواروں کے ناموں کا اعلان کر دیا ہے۔ کانگریس صدر ملکارجن کھرگے بھی ان امیدواروں میں شامل ہیں۔
کرناٹک سے کانگریس نے تین امیدوار میدان میں اتارے ہیں جن میں ملکارجن کھرگے، پارٹی کے میڈیا و پبلسٹی شعبہ کے سربراہ پون کھیرا اور منصور علی خان شامل ہیں۔
تمل ناڈو سے آل انڈیا پروفیشنلز کانگریس کے سربراہ پروین چکرورتی کو امیدوار بنایا گیا ہے۔ پروین چکرورتی اُن رہنماؤں میں شامل رہے ہیں جنہوں نے فلمی اداکار سے سیاستداں بننے والے سی جوزف وجئے کی جماعت تملگا ویٹری کڑگم کے ساتھ اتحاد کی ابتدائی وکالت کی تھی۔
مدھیہ پردیش میں، جہاں کانگریس ایک نشست جیتنے کی پوزیشن میں ہے، پارٹی نے سابق رکنِ پارلیمان اور مندسور لوک سبھا حلقے کی سابق نمائندہ میناکشی نٹراجن کو امیدوار نامزد کیا ہے۔
جھارکھنڈ میں، جہاں کانگریس اپنی اتحادی جماعت جھارکھنڈ مکتی مورچہ کی حمایت سے ایک نشست حاصل کر سکتی ہے، پارٹی نے آل انڈیا کانگریس کمیٹی (اے آئی سی سی) کے سکریٹری اور کانگریس صدر کے دفتر سے وابستہ پرنو جھا کو امیدوار بنایا ہے۔
راجستھان سے موجودہ راجیہ سبھا رکن نیرج ڈانگی کو ایک مرتبہ پھر ایوانِ بالا کے لیے نامزد کیا گیا ہے۔
