جھارکھنڈ میں یونیفارم سیول کوڈ اور این آرسی نافذ نہیں ہوگا: چیف منسٹر کا اعلان

نئی دہلی: چیف منسٹر جھارکھنڈ ہیمنت سورین نے کھلے لفظوں میں کہا کہ جھارکھنڈ میں یونیفارم سیول کوڈ اور این آر سی نہیں نافذ نہیں ہوگا۔ انہوں نے کہا کہ سماج کو توڑنے کی سوچ رکھنے والی بی جے پی کی دال گلنے نہیں دی جائے گی۔ جھارکھنڈ میں صرف سی این ٹی/ایس پی ٹی/پی ای ایس اے چلے گا کوئی یو سی سی اور این آر سی نہیں چلے گا۔

ہیمنت سورین نے اپنے خطاب میں کہا کہ ’’یہ کبھی این آر سی تو کبھی یو سی سی لگانے کی بات کرتے ہیں۔ ہم نے بھی کہہ دیا ہے یہاں یو سی سی اور این آر سی کی کوئی بات نہیں ہوگی۔ یہاں صرف بات ہو گی تو ’چھوٹا ناگپور کاشت کاری‘ (سی این ٹی)، ’سنتھال پرگنہ کاشت کاری‘ (ایس پی ٹی) یا پی ای ایس اے (شیڈولڈ علاقوں میں پنچایتوں کی توسیع) قانون کی بات ہو گی۔ کیسے ملک کو توڑو، کیسے ملک اور سماج کو بانٹو۔ ان کا یہی کام رہتا ہے۔ یہ لوگ زہر اگل رہے ہیں اور انہیں آدیواسیوں، مقامی باشندوں، دلتوں یا پسماندہ برادریوں کی کوئی پرواہ نہیں ہے۔‘‘

ساتھ ہی انہوں نے بی جی پی کی تشبیہ ’سوکھے ہوئے درخت‘ سے کی، اور اسے جڑ سے اکھاڑ پھینکنے کا عہد کیا۔ انہوں نے یہ بھی کہا کہ بی جی پی کا مقصد ہے معدنی دولت کے لئے مقامی باشندوں کو بے گھر کرنا۔