ہندوستانی قونصلیٹ نے سال 2023 میں تارکین وطن کی موت کے معاوضے کے طور پر 5 کروڑ روپے کی رقم ادا کی
جدہ، 13 دسمبر ( عرفان محمد) موت، بلاشبہ، کسی بھی خاندان کے لیے ایک تکلیف دہ تجربہ ہے، خاص طور پر اگر یہ کسی اجنبی سرزمین میں واقع ہوئی ہو جہاں وہ کام کرنے آئے ہوں۔ سوگوار خاندان کا دکھ دردناک ہوتا ہے۔ موت کے معاوضے کا دعوی کرنے کے طریقہ کار اور اصولوں سے ناواقف کچھ اپنے دعوے کو چھوڑ دیتے ہیں۔ تاہم، مملکت میں ہندوستانی مشن سوگوار خاندانوں کی جانب سے ان کی مدد کے لیے پوری توجہ دیتے ہیں اور ان کی پیروی کرتے ہیں۔
پی سی آئی کے قونصلر محمد ہاشم نے کہا کہ جدہ میں ہندوستانی قونصل خانے نے سال 2023 میں اب تک موت کے معاوضے کی رقم پانچ کروڑ روپے سے زیادہ کی رقم ادا کی ہے اور مزید 2 کروڑ روپے کی رقم واجب الادا ہے
میڈیا سے بات کرتے ہوئے سینئر سفارت کار محمد ہاشم نے مزید کہا کہ مرنے والے ورکرس کے قانونی ورثاء میں موت کے معاوضے کی رقم جمع کی جا رہی ہے۔ انہوں نے یہ بھی کہا کہ قونصل خانے نے سعودی عرب کے حکام کی مدد سے ورکرز کی استحقاق کی رقوم جیسا کہ سروس کے اختتامی فوائد اور زیر التواء اجرت کو طے کرنے کی کوشش کی ہے۔
ہاشم نے بتایا کہ ہندوستانی قونصل خانے کے دائرہ اختیار میں 1200 ہندوستانیوں کی موت کی اطلاع ملی ہے جہاں 981 کو سعودی عرب میں مقامی طور پر دفن کیا گیا اور 219 کو آخری رسومات کے لئے وطن واپس بھیج دیا گیا۔
سفارت کار نے انکشاف کیا کہ "قونصل خانے نے 3092 ہندوستانیوں کو وطن واپس بھیج دیا ہے، جنہیں ہروب کے نام سے مطلع کیا گیا تھا، اور مزید 2900 ہم وطنوں کی بھی مدد کی ہے جن کے اقامہ (ریذیڈنسی ویزا) کی میعاد ختم ہو چکی ہے”۔
انہوں نے کہا کہ ہندوستانی قونصلیٹ کی ٹیم ہندوستانی قیدیوں کی خیریت دریافت کرنے کے لیے اپنے دائرہ اختیار میں جیلوں کا دورہ کر رہی ہے اور اس نے اب تک ایسے 25 دورے کیے ہیں۔ ان کے مطابق، ہندوستانی مشن نے ہندوستانیوں کو جیلوں کے ذریعے ملک بدر کرنے کے لیے 2554 ایمرجنسی سرٹیفکیٹ جاری کیے ہیں۔
ہاشم نے کہا کہ قونصل خانے نے 51,980 پاسپورٹ اور 2662 پولیس کلیئرنس سرٹیفکیٹ جاری کیے ہیں اس کے علاوہ 1296 نئے پیدائشوں کا اندراج کیا ہے۔
انہوں نے مزید کہا کہ ہند-سعودی ثقافتی تعلقات کو مضبوط بنانے کی اپنی مسلسل کوششوں میں، قونصل خانہ ہندوستانی کمیونٹی کے ساتھ 19 جنوری 2024 کو انڈین انٹرنیشنل اسکول میں ‘سعودی-انڈیا فیسٹیول’ کا انعقاد کرنے کے لیے تیار ہے۔
