مشہور اسلامی مبلغ مفتی سلمان ازہری کی ضمانت منظور۔ سپریم کورٹ نے فوری رہائی کا دیا حکم

نئی دہلی: مشہور اسلامی مبلغ مفتی سلمان ازہری کی ضمانت سپریم کورٹ نے منظور کردی ہے، تقریبا 9 مہینے سے مفتی سلمان جیل میں مقید تھے جاریہ سال 4 فروری کو نفرت انگیز تقریر کے الزام میں مفتی سلمان کو گجرات اے ٹی ایس کی جانب سے حراست میں لیا تھا ۔جوناگڑھ میں اشتعال انگیز تقریر کے الزام میں پولیس نے دو افراد کو بھی گرفتار کیا تھا۔

گجرات پولیس کے مطابق ممبئی میں مقیم اسلامی مبلغ مفتی سلمان ازہری نے 31 جنوری کی رات یہاں ‘بی’ ڈویژن پولیس اسٹیشن کے قریب ایک کھلے میدان میں منعقدہ ایک پروگرام سے خطاب کیا تھا۔الزام ہے کہ مفتی صاحب نے نفرت انگیز تقریر کی ہے۔ پولیس نے اس معاملے میں ایف آئی آر درج کی تھی۔ اس معاملے میں تعزیرات ہند کی مختلف دفعات کے تحت کیس درج کیا گیا ہے جن میں مختلف مذہبی گروپس کے درمیان دشمنی کو فروغ دینا اور عوام میں فساد پھیلانے جیسی دفعات بھی شامل ہیں۔

ذرائع کے مطابق سپریم کورٹ نے مفتی سلمان ازہری کو جیل سے باہر جانے کی اجازت دیتے ہوئے انہیں فوری رہا کرنے کا حکم دے دیا۔ گجرات حکومت کی طرف سے پیش کئے گئے متعدد دلائل کے باوجود عدالت نے انہیں فوری راحت دینے کا فیصلہ کیا ہے۔