محرم کے انتظامات پر شیعہ مسلم برادری کی نمائندگی پر کے کویتا کا وزیر اقلیتی بہبود سے ربط

ماہ محرم میں موثر انتظامات کے لئے فی الفور اقدامات پر زور

شیعہ مسلم برادری کی نمائندگی پر کے کویتا کا وزیر اقلیتی بہبود سے ربط

حیدرآباد: صدر تلنگانہ جاگروتی و رکن قانون ساز کونسل بی آر ایس کلواکنٹلہ کویتا سے آج شیعہ مسلم برادری کے ایک نمائندہ وفد نے ملاقات کی اور ماہِ محرم کے پیش نظر درپیش مسائل سے واقف کروایا اور ایک میمورنڈم پیش کیا

 

۔وفد نے کویتا کو بتایا کہ ماہ محرم الحرام کا 26 جون سے آغاز عمل میں آئے گا لیکن افسوس کے ساتھ کہنا پڑتا ہے کہ موجودہ حکومت کی جانب سے تاحال کسی بھی قسم کے انتظامات نہیں کئے گئے ہیں۔ متعدد بار نمائندگی کے باوجود کوئی پیشرفت نہیں ہو سکی ہے۔

 

وفد نے اس بات کا بھی ذکر کیا کہ سابقہ کے سی آر حکومت کے دوران محرم کے موقع پر مثالی اور منظم انتظامات کئے جاتے تھےاور ہر سال خصوصی فنڈز مختص کر تے ہوئے برادری کے جذبات کا احترام کیا جاتا تھا۔ موجودہ کانگریس حکومت میں سابقہ حکومت کے ہی مختص فنڈز استعمال کئے جا رہے ہیں

 

۔ اس مرتبہ کوئی نیا یا اضافی بجٹ جاری نہیں کیا گیا۔صدر تلنگانہ جاگروتی نے وفد کی شکایات اور نمائندگی کی بغور سماعت کی اور ریاستی وزیراقلیتی بہبود اے لکشمن کمار سے فون پر بات کی اور محرم کے موقع پر درکار ضروری انتظامات کے سلسلے میں فوری اقدامات پر زور دیا۔

 

انہوں نے درخواست کی کہ مذہبی ہم آہنگی اور روایتی احترام کو قائم رکھتے ہوئے محرم کے جلوس و مجالس کے لئے مکمل سرکاری تعاون فراہم کیا جائے۔ ریاستی وزیر اقلیتی بہبود نے رکن کونسل کویتا کو یقین دلایا کہ وہ جلد ہی وفد سے شخصی طور پر ملاقات کریں گے اور ان کے تمام مسائل و مطالبات پر تفصیلی تبادلہ خیال کرتے ہوئے ہر ممکنہ امداد اور تعاون کی فراہمی کو یقینی بنائیں گے۔