حیدرآباد میں قطب شاہی درگاہ کے قبرستان کی مسماری – مجلس کا پولیس اسٹیشن میں احتجاج ؛ خاطیوں کے خلاف کارروائی کا مطالبہ

حیدرآباد کے مضافاتی علاقہ ناگول پولیس اسٹیشن حدود میں واقع 400 سالہ قطب شاہی درگاہ حضرت متّو شاہ باباؒ کے احاطہ میں قبروں کو منہدم کرکے زمین دوز کردی گئی

 

۔ یہ عمل مبینہ طور پر پڑوس کے ایک خانگی اسکول کی پرنسپل کی ہدایت پر ایک کنٹراکٹر کے ذریعے انجام دیا گیا، جس سے متعدد قبروں کی بے حرمتی ہوئی

 

۔واقعہ کی اطلاع پر صدر مجلس بیرسٹر اسدالدین اویسی اور فلور لیڈر اکبرالدین اویسی نے پولیس کے اعلیٰ عہدیداروں سے رابطہ کرتے ہوئے شدید برہمی ظاہر کی اور ذمہ داروں کے خلاف سخت قانونی کارروائی کا مطالبہ کیا

 

۔اویسی برادران کی ہدایت پر رکن کونسل مرزا رحمت بیگ قادری نے فوری طور پر ڈی سی پی ایل بی نگر اور بعد ازاں اے ڈی سی پی سے ملاقات کرکے تفصیلات حاصل کی اور سخت احتجاج درج کرایا۔

 

بعد میں وہ ناگول پولیس اسٹیشن پہنچے جہاں کارپوریٹرز حسینی پاشا اور عبد الرحمن سمیت بڑی تعداد میں مقامی عوام اور مجلس کے ذمہ داران موجود تھے۔عوام نے قبروں کی بے حرمتی کی شدید مذمت کرتے ہوئے ملزمین کے خلاف فوری کارروائی کا مطالبہ کیا۔