حیدرآباد کے پرانا پل کشیدگی کے بعد بیرسٹر اویسی کا دورہ، شہریوں سے امن قائم رکھنے کی اپیل۔
حیدرآباد شہر میں چہارشنبہ کی رات پرانا پل علاقے میں پیدا ہونے والی فرقہ وارانہ کشیدگی کے بعد کل ہند مجلس اتحاد المسلمین کے صدر اور حیدرآباد کے رکن پارلیمنٹ بیرسٹر اسدالدین اویسی نے جمعرات کی صبح علاقے کا دورہ کیا۔
انہوں نے موقع پر پہنچ کر حالات کا جائزہ لیا اور زمینی صورتحال کا مشاہدہ کیا۔ بعد ازاں پارٹی ہیڈکوارٹر دارالسلام میں میڈیا سے بات کرتے ہوئے انہوں نے کہا کہ حیدرآباد میں بار بار فرقہ وارانہ امن کو نقصان پہنچانے کی کوششیں کی جا رہی ہیں اور یہ واقعات تشویشناک ہیں اور شہر کے ماحول کے لیے نقصان دہ ثابت ہو سکتے ہیں
۔ بیرسٹر اسدالدین اویسی نے پولیس سے مطالبہ کیا کہ حساس علاقوں کی کڑی نگرانی کی جائے اور مؤثر روک تھام کے اقدامات کیے جائیں۔ ساتھ ہی انہوں نے پرانا پل اور شہر کے دیگر علاقوں کے عوام سے اپیل کی کہ کسی بھی اشتعال انگیزی کو مسترد کریں کیونکہ شہر کی ترقی اور خوشحالی کے لیے امن و استحکام بے حد ضروری ہے۔
ذرائع نے بتایا کہ چہارشنبہ کی رات پرانا پل دروازہ کے قریب نامعلوم شرپسندوں نے تہوار کی مبارکباد کے لیے لگائے گئے ایک پوسٹر کو پھاڑ دیا جس کے بعد وہاں ہنگامہ آرائی شروع ہوگئی۔
شرپسندوں نے چھلہ مبارک میں نصب جھنڈے کو اکھاڑ کر سڑک پر پھینک دیا اور نشان مبارک کو نقصان پہنچایا۔ مزاحمت کرنے والے چند نوجوان زخمی ہوگئے جنہیں دواخانہ منتقل کیا گیا۔
پولیس نے فوری کارروائی کرتے ہوئے حالات پر قابو پالیا اور لاٹھی چارج کے ذریعے ہجوم کو منتشر کردیا
