نظام آباد کے بودھن روڈ پر انتہائی افسوسناک دِلخراش سڑک حادثہ، ضعیف والدہ برسر موقع ہلاک ،بیٹا شدید زخمی،
نظام آباد کے بودھن روڈ پر انتہائی افسوسناک دِلخراش سڑک حادثہ، ضعیف والدہ برسر موقع ہلاک ،بیٹا شدید زخمی،
نظام آباد مجلس قائدین نے بروقت گورنمنٹ ہاسپٹل پہنچ کر زیر علاج شیخ مقبول کی عیادت کی،
مرحومہ اختری بیگم کے پوسٹ مارٹم و زخمی زیر علاج شیخ مقبول کے بہتر علاج کیلئے سپرنٹنڈنٹ ہاسپٹل سے نمائندگی،
نظام آباد 10ڈسمبر(اردو لیکس)نظام آباد، شہر کے بودھن روڈ شاہراہ پر ایک دلخراش سڑک حادثہ پیش آیا، صبح 8:30 بجے اس انتہائی افسوس ناک واقعہ میں ڈیویثزن 12 کے رہنے والے شیخ مقبول اپنی ضعیف المر والدہ اختری بیگم کے ہمراہ موٹر سائیکل پر بودھن جارہے تھے کہ نظام پیالس فنگشن ہال کے روبرو ایک تیز رفتار لاری نے انھیں پیچھے سے ٹکر دے دی یہ حادثہ اتنا خوفناک تھا کہ موٹر سائیکل پر سوار ضعیف خاتون اختری بیگم عمر 80 سال کی برسر موقع موت واقع ہوگئی
، شیخ مقبول شدید زخمی ہونے پر انتہائی نازک صورتحال میں گورنمنٹ ہاسپٹل منتقل کیا گیا ہے، بتایا جاتا ہے کہ شیخ مقبول کے سرپر گہری چوٹیں آئی جسے علاج کی غرض سے گورنمنٹ ہاسپٹل آئی سی یو وارڈ میں رکھا گیا ہے، اس دِلخراش سڑک حادثہ اور افسوسناک واقعہ کی اطلاع ملتے ہی نظام آباد مجلس قائدین نے گورنمنٹ ہاسپٹل پہنچ کر شیخ مقبول کی عیادت کی بعد ازاں سپرنٹنڈنٹ گورنمنٹ ہاسپٹل سے بات کرتے ہوئے شدید زخمی شیخ مقبول کے بہتر علاج کیلئے زور دیا،
بتایا جاتا ہے کہ شیخ مقبول کے افراد خاندان میں بیوی کے علاوہ دو لڑکیاں اور ایک لڑکا شامل ہیں، ساتھ ہی ساتھ مجلس قائدین نے پوسٹ مارٹم روم پہنچ کر مرحومہ اختری بیگم کے بھائی و دیگر رشتہ داروں سے بھی ملاقات کی اور پوسٹ مارٹم کے مراحل میں درکار مدد و بھر پور رہنمائی کا تیقن دیا، ٹاون صدر مجلس شکیل احمد فاضل نے اے سی پی راجہ وینکٹ ریڈی اور 6 ٹاون پولیس عہدیداروں سے بات کرتے ہوئے لاری کو ضبط کرتے ہوئے لاری مالک اور ڈرائیور پر سخت کارروائی کرنے کا مطالبہ کیا ہے، اے سی پی راجہ وینکٹ ریڈی نے کہا کہ لاری کو ضبط اور لاری مالک اور ڈرائیور کو پولیس اپنی تحویل میں لے چکی ہے
، اس خصوص میں ٹاون صدر مجلس شکیل احمد فاضل نے میڈیا سے گفتگو کرتے ہوئے کہا کہ 2022 سابقہ تلنگانہ ریاستی حکومت کے دور اقتدار میں صدر مجلس و رکن پارلیمان حیدرآباد بیرسٹر اسد الدین اویسی کی ہدایت پر نظام آباد مجلس قائدین نے مونسپل کونسل میں بودھن روڈ کی توسیع و فور وے کیلئے قرارداد منظور کروائی تھی،
اس سڑک کا افتتاح تو ہوگیا پر افسوس سڑک کی توسیع اور فور وے ٹریک کا کام آج بھی تعطل کا شکار ہے، انہوں نے کہا کہ مجلس کی نمائندگی پر مونسپل کونسل میں ارسہ پلی تا سارنگ پور 4 لائن ٹریک کے کاموں کیلئے فنڈز بھی منظور کیا گیا تھا اور ٹنڈر بھی طلب کیا گیا تھا بعد ازاں کانگریس حکومت آنے کے بعد ایک سال قبل ارسہ پلی تا سارنگ پور 4 لائن ٹریک کے کاموں کا دوبارہ افتتاح کیا گیا
لیکن متعلقہ کنٹریکٹر کی جانب سے کاموں کا آغاز نہیں کیا جارہاہے جسکی وجہ سے بودھن روڈ کی تنگ دامنی اور خستہ حالت آیے دن جان لیوا حادثوں کا سبب بن رہی ہے، نظام آباد مجلس قائدین وفد نے تلنگانہ ریاستی حکومت و ضلع انتظامیہ و محکمہ ارباب بشمول ضلع کلکٹر سے پر زور مطالبہ کیا ہے کہ وہ ارسہ پلی تا سارنگ پور 4 لائن ٹریک کے رکے ہوئے کاموں کا جلد از آغاز کیا جائے تاکہ روزانہ اس سڑک سے گزرنے والے راہ گیروں و غریب عوام کو جان لیوا حادثات سے محفوظ رکھا جاسکے،
اس خوفناک دِلخراش حادثہ کی اطلاع ملتے ہی گورنمنٹ ہاسپٹل پہنچ کر زخمی شیخ مقبول کی عیادت و بہتر علاج اور مرحومہ اختری بیگم کے پوسٹ مارٹم کیلئے بروقت نمائندگی پر شیخ مقبول کے افراد خاندان نے صدر مجلس و رکن پارلیمان حیدرآباد بیرسٹر اسد الدین اویسی ،انچارج نظام آباد مجلس و رکن اسمبلی ملک پیٹھ احمد بن عبداللہ بلعلہ اور مقامی مجلس قائدین سے اظہار تشکر کیا ہے، اس موقع پر ٹاون جنرل سیکرٹری محمد شہباز احمد، جوائنٹ سیکرٹری و سینئر کارپوریٹر اعجاز حسین، عبدالعلی باغبان، ارشد پاشاہ , خلیل احمد، سید لطیف موجود تھے،
