تلنگانہ میں شدید گرمی کی لہر برقرار، 19 اضلاع میں درجۂ حرارت 46 ڈگری سے تجاوز – نرمل میں سب سے زیادہ درجہ حرارت

حیدرآباد: تلنگانہ میں شدید گرمی اور لو کی لہر نے عوام کو بے حال کردیا ہے۔ ریاست کے 19 اضلاع میں درجۂ حرارت 46 ڈگری سیلسیس سے تجاوز کرگیا جبکہ کئی علاقوں میں سورج آگ برساتا نظر آیا۔

محکمہ موسمیات کے مطابق تلنگانہ کے ضلع نرمل میں سب سے زیادہ 46.5 ڈگری سیلسیس درجۂ حرارت ریکارڈ کیا گیا۔ اس کے علاوہ ہنمکنڈہ میں 46.4، جگتیال میں 46.3 اور عادل آباد میں 46.2 ڈگری سیلسیس درجۂ حرارت درج کیا گیا۔

شدید گرمی کے باعث عوام کو غیر ضروری طور پر گھروں سے باہر نہ نکلنے کا مشورہ دیا گیا ہے۔ محکمہ صحت اور ضلعی انتظامیہ نے خاص طور پر بچوں، معمر افراد اور بیمار لوگوں کو احتیاط برتنے کی ہدایت دی ہے۔ ریاست کے مختلف علاقوں میں آئندہ چند دنوں تک گرمی کی شدت برقرار رہنے کا امکان ظاہر کیا گیا ہے۔