تلنگانہ میں ایس ایس سی امتحانات 14 مارچ سے شروع — 5منٹ تاخیر سے آنے والے طلبہ کو داخلہ نہیں ملے گا
تلنگانہ میں ایس ایس سی کے سالانہ امتحانات کا آغاز 14 مارچ سے ہونے جا رہا ہے جو 16 اپریل تک جاری رہیں گے۔ ریاستی محکمۂ تعلیم کے مطابق امتحانات کے پرامن اور منظم انعقاد کے لیے تمام تیاریاں مکمل کرلی گئی ہیں اور متعلقہ حکام کو ضروری ہدایات جاری کی گئی ہیں۔
حکام نے واضح کیا ہے کہ امتحان شروع ہونے کے مقررہ وقت کے بعد صرف 5 منٹ کی تاخیر کی گنجائش دی جائے گی، یعنی صبح 9:35 بجے تک ہی طلبہ کو امتحانی مراکز میں داخل ہونے کی اجازت ہوگی۔ اس کے بعد کسی بھی طالب علم کو مرکزِ امتحان میں داخلے کی اجازت نہیں دی جائے گی۔ اس فیصلے کا مقصد امتحانی نظم و ضبط کو برقرار رکھنا اور نقل جیسے مسائل کو روکنا بتایا گیا ہے۔
طلبہ کو مشورہ دیا گیا ہے کہ وہ امتحانی مراکز پر کم از کم ایک گھنٹہ پہلے پہنچ جائیں تاکہ انہیں کسی بھی قسم کی پریشانی یا تاخیر کا سامنا نہ کرنا پڑے۔ امتحانی مراکز کے اطراف میں ٹریفک کے مسائل سے بچنے کے لیے بھی پیشگی منصوبہ بندی کرنے کی ہدایت دی گئی ہے۔
اس سال ریاست بھر میں قائم کردہ 2,676 امتحانی مراکز پر مجموعی طور پر 5,17,727 طلبہ امتحان میں شرکت کریں گے۔ ان میں 1,582 سرکاری اسکولوں جبکہ 1,094 خانگی اسکولوں کے مراکز شامل ہیں۔ امتحانات کے دوران نظم و نسق کو برقرار رکھنے کے لیے خصوصی فلائنگ اسکواڈس، محکمہ تعلیم کے عہدیداران اور پولیس کی نگرانی بھی رہے گی۔
محکمۂ تعلیم نے تمام طلبہ سے اپیل کی ہے کہ وہ امتحانات کے دوران قواعد و ضوابط کی پابندی کریں، نقل سے گریز کریں اور مکمل تیاری کے ساتھ امتحانات میں شرکت کریں تاکہ بہتر نتائج حاصل کیے جا سکیں۔
