الکٹرک گاڑیوں پر ٹیکس چھوٹ۔ تلنگانہ حکومت کا فیصلہ

حیدرآباد _ تلنگانہ حکومت نے ریاست میں الیکٹرک گاڑیوں (ای وی) کے استعمال کو فروغ دینے کے لیے اہم قدم اٹھاتے ہوئے ان گاڑیوں کو رجسٹریشن فیس سے مستثنیٰ قرار دیا ہے۔ یہ اعلان ریاستی وزیر ٹرانسپورٹ پونم پربھاکر نے میڈیا سے بات چیت کے دوران کیا۔

وزیر ٹرانسپورٹ کے مطابق، جی او 41 کے تحت متعارف کردہ ای وی پالیسی کا اطلاق کل سے ہوگا اور یہ سال 2026 تک نافذ رہے گی۔ اس پالیسی کے تحت موٹر سائیکلوں، آٹوز اور ٹرانسپورٹ بسوںپر 100 فیصد ٹیکس چھوٹ دی جائے گی۔ حیدرآباد اور سکندرآباد میں جلد ہی الیکٹرک بسیں متعارف کروائی جائیں گی، جو پبلک ٹرانسپورٹ کو ماحولیاتی طور پر دوستانہ بنانے کی سمت میں ایک اہم قدم ہے۔

پونم پربھاکر نے عوام سے اپیل کی کہ وہ روایتی ایندھن سے چلنے والی گاڑیوں کے بجائے الیکٹرک گاڑیاں خریدنے پر توجہ دیں۔ انہوں نے کہا کہ الیکٹرک گاڑیاں نہ صرف ماحولیاتی تحفظ میں مددگار ہیں بلکہ صارفین کے لیے مالی طور پر بھی فائدہ مند ثابت ہوں گی، کیونکہ ان کے استعمال سے سالانہ ایک لاکھ روپے تک کی بچت ممکن ہے۔

حکومت کا یہ اقدام نہ صرف ماحول کی حفاظت کے لیے ایک اہم کوشش ہے بلکہ توانائی کے متبادل ذرائع کے استعمال کو فروغ دینے میں بھی مددگار ثابت ہوگا۔ الیکٹرک گاڑیوں کی فروخت میں اضافہ ریاست کو کاربن کے اخراج میں کمی اور بہتر ماحولیاتی صورتحال کی طرف لے جائے گا۔