آکوٹ نگر پریشد کی امیدوار الماس پروین سڑک حادثہ میں ہلاک۔آکوٹ شہر میں غم کی لہر۔ انتخابی ماحول میں این سی پی کو بڑا جھٹکا

آکولہ ،۳۰ نومبر (ڈاکٹر محمد راغب دیشمکھ کی رپورٹ)نگر پنچایت اور نگر پالیکا انتخابات کے زور و شور کے درمیان آکوٹ میں نیشنلسٹ کانگریس پارٹی (اجیت پوار گروپ) کو اس وقت شدید صدمہ پہنچا جب اس کی امیدوار الماس پروین شیخ سلیم ایک المناک سڑک حادثے میں جاں بحق ہوگئیں۔

 

 

ان کے اچانک انتقال سے آکوٹ شہر سمیت پورے سیاسی حلقے میں غم و اندوہ کی فضا چھا گئی ہے۔مہاراشٹر میں مقامی خود مختار اداروں کے انتخابات کی سرگرمیاں عروج پر ہیں۔ آکولہ ضلع کے آکوٹ، تلاہارا، مرتضیٰ پور، بالا پور، ہیور کھیر نگر پالیکا اور بارسی ٹاکلی نگر پنچایت میں انتخابی مہم جاری ہے۔ انہی انتخابات کے دوران آکوٹ نگر پالیکا کے وارڈ نمبر 4 سے این سی پی (اجیت پوار گروپ) کی

 

 

باقاعدہ امیدوار الماس پروین شیخ سلیم کی ناگہانی موت نے ماحول سوگوار کردیا۔ذرائع کے مطابق چند روز قبل ہی وہ اجیت پوار کی انتخابی ریلی میں بھی نظر آئی تھیں۔ آج وہ اپنے شوہر اور بچوں کے ساتھ میکے روانہ ہوئی تھیں کہ امراوتی ضلع کے پرَت واڑہ علاقے میں ایک تیز رفتار ٹرک نے ان کی موٹرسائیکل کو زور دار ٹکر مار دی۔ خوفناک حادثے میں الماس پروین نے موقع پر ہی دم توڑ دیا جبکہ ان کے شوہر اور بچے بھی شدید زخمی ہوگئے جنہیں

 

 

 

فوری طور پر اسپتال منتقل کیا گیا۔حادثے کی اطلاع ملتے ہی پولیس نے موقع پر پہنچ کر پنچ نامہ کیا اور ضروری کارروائی شروع کی۔ انتخابی میدان میں سرگرم ایک خاتون امیدوار کی اچانک موت نے آکوٹ کے سیاسی حلقے کو ہلا کر رکھ دیا ہے۔ادھر نیشنلسٹ کانگریس پارٹی (اجیت پوار گروپ) نے غم کے اس موقع پر اپنی تمام انتخابی ریلیاں اور جلسے

 

 

فوری طور پر منسوخ کرنے کا اعلان کیا ہے۔ ضلعی عہدیداران کے مطابق پارٹی کے لیے یہ ایک بڑا نقصان ہے جس کی بھرپائی ممکن نہیں۔