مسلمان ووٹ دے یا نہ دے _ ان سے ملاقات کریں _ وزیراعظم نریندر مودی کی قائدین اور کارکنوں کو ہدایت
نئی دہلی _ 18 جنوری ( اردولیکس) نئی دہلی میں منعقدہ بی جے پی کی قومی عاملہ کے اجلاس میں وزیراعظم نریندر مودی نے مسلمانوں کو پارٹی سے قریب کرنے کی حکمت عملی کو پیش کیا۔ میڈیا رپورٹس کے مطابق عاملہ کے اجلاس میں اپنے خطاب میں وزیراعظم مودی نے کارکنوں سے کہا کہ وہ مسلم کمیونٹی کے بارے میں غلط بیانات نہ دیں۔ بلکہ ملک بھر کے مسلمانوں کے پاس جائیں اور ان سے بات کریں۔ وزیراعظم مودی نے خصوصی طور پر پسماندہ مسلمانوں سے بات کرنے کو کہا ہے۔ مودی نے کہا کہ کوئی ووٹ دے یا نہ دے لیکن ان سے ضرور ملنا چاہیے۔ وزیراعظم مودی نے اشاروں میں بڑا بولتے ہوئے کہا کہ بہت سے لیڈروں کو مہذب زبان بولنے کی ضرورت ہے۔ یہی نہیں، پی ایم مودی فلموں کی غیر ضروری مخالفت کو لے کر بھی برہم ہو گئے ہیں۔ جس میں خاص طور پر پٹھان فلم پر بی جے پی قائدین کے ریمارکس شامل ہیں
بھارتیہ جنتا پارٹی کے اتنے بڑے پیمانے پر مسلمانوں پر توجہ مرکوز کرنے کے پیچھے کی براہ راست وجہ ووٹ ہی ہے۔ بتایا جاتا ہے کہ ہر الیکشن میں بھارتیہ جنتا پارٹی کو پچھلے الیکشن کے مقابلے مسلمانوں سے زیادہ ووٹ ملتے ہیں۔ ایسے میں مودی چاہ رہے ہیں کہ جو مسلم طبقہ انہیں ووٹ دے رہا ہے وہ ان کی پارٹی کو فعال طور پر سپورٹ کرے۔ اس لیے انھوں نے اپنی پارٹی کے قائدین کو مسلمانوں کے بارے میں غلط بیانات دینے سے منع کیا ہے۔
ایک خبر کے مطابق 2009 سے اب تک ہونے والے انتخابات میں بھارتیہ جنتا پارٹی کو ملنے والے مسلم ووٹوں کی تعداد میں مسلسل اضافہ ہو رہا ہے۔ 2009 کے لوک سبھا انتخابات میں بھارتیہ جنتا پارٹی کو 4 فیصد مسلم ووٹ ملے تھے۔ جبکہ اگلے الیکشن یعنی 2014 میں یہ تعداد دگنی سے بھی زیادہ ہو گئی ہے۔ 2014 میں بی جے پی کو 9 فیصد مسلم ووٹ ملے تھے۔ جبکہ 2019 میں دوبارہ یہ تعداد دگنی یعنی 20 فیصد سے بھی زیادہ ہوگئی ہے۔
یہی وجہ ہے کہ بھارتیہ جنتا پارٹی اب مسلم کمیونٹی کے حوالے سے اپنا امیج بہتر کرنا چاہے گی اور 20 فیصد سے زیادہ مسلم ووٹ حاصل کرنا چاہے گی۔
2023 اور 2024 سیاسی جماعتوں کے لیے بہت اہم ہیں۔ کیونکہ 2023 میں 9 ریاستوں میں انتخابات اور 2024 میں لوک سبھا کے انتخابات ہونے ہیں۔ ایسے میں پارٹیوں نے الیکشن کی تیاریاں شروع کر دی ہیں۔ ملک کی سب سے بڑی پارٹی بی جے پی نے قومی ایگزیکٹو کی دہلی میٹنگ میں اپنی انتخابی حکمت عملی کے حوالے سے اہم میٹنگ کی۔ میٹنگ کے دوسرے دن وزیراعظم نریندر مودی نے بی جے پی قائدین اور کارکنوں کو سخت ہدایات دی ہیں۔ اس کے ساتھ مسلمانوں کے بارے میں ایک بڑی بات کہی گئی ہے۔
