مسلم نمائندگی کے بغیر تشکیل پا رہی ہے مودی کی کابینہ _ دو سال سے کابینہ میں مسلم نمائندگی ختم
حیدرآباد _ 9 جون ( اردولیکس ڈیسک) بی جے پی کی قیادت میں این ڈی اے تیسری بار حکومت بنانے کے لیے تیار ہے چند گھنٹوں بعد یعنی شام 7 بجے نریندر مودی اور ان کی کابینہ کے 30 ارکان حلف لینے والے ہیں لیکن ان میں ایک بھی مسلمان نہیں ہے اس طرح اس مرتبہ بھی بغیر مسلم نمائندگی کے مودی کی کابینہ تشکیل پانے والی ہے
این ڈی اے کے پاس 293 لوک سبھا ارکان پارلیمنٹ کی مشترکہ طاقت ہے، اس میں مسلم یا دیگر اقلیتی طبقہ کا ایک بھی رکن نہیں ہے ہندوستان ٹائمز کی ایک رپورٹ کے مطابق این ڈی اے کے 33.2 فیصد ارکان پارلیمنٹ اعلیٰ ذاتوں سے ہیں، 15.7 فیصد درمیانی ذات سے اور 26.2 فیصد دیگر پسماندہ ذاتوں سے ہیں، کوئی بھی مسلمان، عیسائی یا سکھ برادریوں سے نہیں ہے۔
ماہر سیاسیات گلیس وینیر کے تجزیے سے پتہ چلتا ہے کہ انڈیا بلاک کے 235 ارکان پارلیمنٹ میں مسلمان 7.9 فیصد، سکھ 5 فیصد اور عیسائی 3.5 فیصد ہیں۔ تجزیہ یہ بھی ظاہر کرتا ہے کہ ایوان زیریں میں ہندوستانی بلاک کی طاقت کا 12.4 فیصد، 11.9 فیصد اور 30.7 فیصد بلترتیب اعلیٰ ذاتیں، درمیانی ذاتیں اور او بی سی ہیں۔ میڈیا رپورٹس کے مطابق
11 بڑی جماعتوں نے کل 82 مسلم امیدوار کھڑے کئے تھے جن میں سے 21 نے کامیابی حاصل کی۔ 82 میں سے 5 کو این ڈی اے کی اتحادی جماعتوں نے میدان میں اتارا تھا، جس میں ایک امیدوار بی جے پی کا بھی شامل تھا
بی جے پی کے واحد مسلم امیدوار ڈاکٹر عبدالسلام کیرالا کے ملاپورم لوک سبھا حلقہ سے مقابلہ کئے تھے لیکن انھیں تیسرا مقام حاصل ہوا ۔ اس حلقہ سے انڈین یونین مسلم لیگ کے امیدوار ای ٹی محمد بشیر نے شاندار کامیابی حاصل کی۔ انھوں نے سی پی آئی ایم کے امیدوار واصف کو شکست دے دی۔
بتایا جاتا ہے کہ جولائی 2022 میں مختار عباس نقوی کی میعاد ختم ہونے کے بعد سے، نریندر مودی کی کابینہ سے بھی مسلم نمائندگی ختم ہو گئی ۔ نقوی نے 2014 سے 2022 تک اقلیتی امور کے وزیر کے طور پر خدمات انجام دیں۔
18ویں لوک سبھا کے لیے منتخب ہونے والے 24 مسلم ممبران پارلیمنٹ میں سے 21 کا تعلق انڈیا بلاک سے ہے۔ ان میں کانگریس سے 7، ترنمول کانگریس (ٹی ایم سی) سے 5، سماج وادی پارٹی (ایس پی) کے 4، انڈین یونین مسلم لیگ (آئی یو ایم ایل) کے 3 اور جموں و کشمیر نیشنل کانفرنس (این سی) کے 2 شامل ہیں۔
بقیہ تین مسلم ارکان پارلیمنٹ میں آل انڈیا مجلس اتحاد المسلمین (اے آئی ایم آئی ایم) کے سربراہ اور حیدرآباد سے پانچ بار کے رکن پارلیمنٹ بیرسٹر اسد الدین اویسی اور دو آزاد امیدوار – بارہمولہ حلقہ سے عبدالرشید شیخ یا انجینئر رشید اور لداخ سے محمد حنیفہ شامل ہیں۔
