سونے اور چاندی کی قیمت پھر آسمان پر

نئی دہلی: سونے کی قیمتوں میں مسلسل کمی کے بعد اچانک دوبارہ اضافہ ہوگیا ہے۔ گزشتہ چھ دنوں سے سونے کی قیمتوں میں مسلسل کمی آرہی تھی لیکن اب ایک بار پھر قیمت میں اضافہ ہوگیا ہے۔

 

صرف ایک دن میں 10 گرام خالص سونے کی قیمت میں تقریباً 4,000 روپے کا اضافہ ہوا ہے۔ اس اضافے کے بعد سونے کی قیمت دوبارہ 1.60 لاکھ روپے کی سطح پر پہنچ گئی ہے۔ چہارشنبہ کے روز 10 گرام سونے کی قیمت 1,56,100 روپے تھی۔

 

حیدرآباد میں جمعرات کی شام 7 بجے تک اسپاٹ گولڈ کی 10 گرام قیمت تقریباً 1.60 لاکھ روپے پر برقرار رہی۔اسی طرح چاندی کی قیمت میں بھی تقریباً 5,000 روپے کا اضافہ ہوا ہے جس کے بعد یہ 2.41 لاکھ روپے فی کلو کے قریب ٹریڈ کر رہی ہے۔

 

بین الاقوامی مارکیٹ میں اسپاٹ گولڈ کی قیمت 4,477 ڈالر فی اونس جبکہ چاندی کی قیمت تقریباً 66 ڈالر فی اونس پر ٹریڈ کر رہی ہے۔سونے کی قیمت دوبارہ کیوں بڑھی؟حال ہی میں مغربی ایشیا میں بڑھتی ہوئی کشیدگی اور تیل کی قیمتوں میں اضافے کے خدشات کے باعث سونے کی قیمتوں میں بڑی کمی دیکھی گئی تھی۔

 

اس وجہ سے لوگوں کو توقع تھی کہ سونے کی قیمت مزید کم ہوگی لیکن اسی دوران امریکی ٹریژری بانڈز پر منافع میں کمی آنے سے سونے اور چاندی کی طلب دوبارہ بڑھ گئی۔