حیدرآباد میں باسی اور خراب گوشت فروخت کرنے والا گروہ بے نقاب – 12 ٹن مٹن ضبط
حیدرآباد سٹی پولیس کی کمشنر ٹاسک فورس (گولکنڈہ زون) نے ایچ فاسٹ ٹیم اور منگل ہاٹ پولیس کے ساتھ مشترکہ کارروائی کرتے ہوئے باسی اور خراب بھیڑ و بکری کے آلائش (پایا، سرہ، بھیجہ، گردے، کلیجی وغیرہ) کو غیر قانونی طور پر ذخیرہ کرکے فروخت کرنے والے ایک گروہ کا پردہ فاش کر دیا۔ پولیس نے تقریباً 12 ٹن خراب گوشت ضبط کیا جس کی مالیت تقریباً 10 لاکھ روپے بتائی گئی ہے۔
یہ کارروائی امان نگر کالونی، منگل ہاٹ میں اکبری مسجد کے قریب واقع “A to Z شیپ اینڈ گوٹ آفَل” نامی گودام پر چھاپے کے دوران انجام دی گئی۔ پولیس نے موقع سے منیجر رفیع احمد (52) کو گرفتار کر لیا، جبکہ دکان کا مالک محمد افروز فرار ہو گیا ہے۔
پولیس کے مطابق ملزمان سستے داموں خراب اور باسی گوشت خرید کر اسے ڈیپ فریزر اور پانی سے بھرے ٹبوں میں طویل عرصے تک محفوظ رکھتے تھے تاکہ بدبو کو چھپایا جا سکے۔ بعد ازاں اسی گوشت کو تازہ اور معیاری ظاہر کرکے شادیوں، تقریبات اور ہوٹلوں کو سپلائی کیا جاتا تھا، جس سے انسانی صحت کو شدید خطرات لاحق ہو رہے تھے۔
تحقیقات میں یہ بھی سامنے آیا کہ فرار ملزم محمد افروز اس سے قبل بھی اسی نوعیت کے معاملات میں ملوث رہ چکا ہے اور اس کے خلاف کیس درج ہونے کے ساتھ جی ایچ ایم سی کی جانب سے جرمانہ بھی عائد کیا گیا تھا۔
پولیس نے اس معاملے میں مقدمہ درج کر کے مزید تحقیقات شروع کر دی ہیں، جبکہ ماہرین نے خبردار کیا ہے کہ اس طرح کا خراب گوشت استعمال کرنے سے سنگین بیماریوں کا خطرہ بڑھ سکتا ہے۔
