مکتھل میں انسانیت سوز واقعہ، 12 سالہ بیٹے کے سامنے ماں سے اجتماعی جنسی زیادتی؛ حالت تشویشناک
مکتھل: نارائن پیٹ ضلع کے مکتھل شہر میں جمعرات کی علی الصبح ایک انتہائی افسوسناک اور انسانیت سوز واقعہ پیش آیا، جہاں سرکاری جونیئر کالج کی عمارت کے قریب سوئی ہوئی ایک خاتون پر دو نامعلوم افراد نے مبینہ طور پر جنسی حملہ کیا اور شدید تشدد کا نشانہ بنایا۔ حملہ آوروں نے خاتون کے جسم کے حساس حصے کو بھی زخمی کیا، جس کے باعث وہ شدید زخمی ہوگئی۔
تفصیلات کے مطابق مکتھل کی رہنے والی مذکورہ خاتون گزشتہ کئی برس سے اپنے 12 سالہ بیٹے کے ساتھ تنہا زندگی گزار رہی ہے۔ روزگار کا کوئی مستقل ذریعہ نہ ہونے کے باعث وہ شہر کے اہم چوراہوں اور بس اسٹینڈ پر بھیک مانگ کر گزر بسر کرتی ہے۔ بتایا گیا ہے کہ وہ گزشتہ تقریباً 10 برس سے رات کے اوقات میں مکتھل سرکاری جونیئر کالج کی عمارت کے قریب اپنے بیٹے کے ساتھ پناہ لیتی تھی۔
جمعرات کی صبح دو نامعلوم افراد وہاں پہنچے اور سوئی ہوئی خاتون پر حملہ کرنے کی کوشش کی۔ خاتون کی چیخ و پکار سن کر اس کا 12 سالہ بیٹا بیدار ہوگیا اور دونوں افراد کو روکنے کی کوشش کی، تاہم مبینہ طور پر نشے میں دھت حملہ آوروں نے بچے پر بھی حملہ کرنے کی کوشش کی، جس پر وہ خوفزدہ ہوکر وہاں سے بھاگ گیا۔
اس دوران دونوں افراد نے خاتون پر مبینہ طور پر جنسی حملہ کیا اور بعد ازاں اسے شدید زخمی کرکے موقع سے فرار ہوگئے۔ خاتون خون میں لت پت حالت میں وہیں پڑی رہی۔
صبح کے وقت مکتھل منی اسٹیڈیم گراؤنڈ میں چہل قدمی کے لیے آنے والے مقامی افراد کی نظر زخمی خاتون پر پڑی۔ انہوں نے فوری طور پر پولیس کو اطلاع دی۔ اطلاع ملتے ہی مکتھل پولیس موقع پر پہنچی اور شدید زخمی خاتون کو علاج کے لیے اسپتال منتقل کیا۔
پولیس نے واقعہ کا مقدمہ درج کرکے تحقیقات شروع کردی ہیں۔ حملہ آوروں کی شناخت اور گرفتاری کے لیے پولیس مختلف پہلوؤں سے تفتیش کر رہی ہے۔
