رشتوں کو شرمسار کرنے والا واقعہ – ماں اور داماد نے مل کر بیٹی کا قتل کردیا

بہار: داماد سے مبینہ ناجائز تعلقات کے باعث ماں نے بیٹی کو قتل کر دیا، ماں اور داماد گرفتار

 

بہار کے ضلع ارریہ میں ایک دل دہلا دینے والا واقعہ سامنے آیا ہے جہاں مبینہ طور پر داماد سے ناجائز تعلقات رکھنے والی ماں نے اپنی 16 سالہ بیٹی کو قتل کر دیا۔ پولیس نے مقتولہ کی ماں شائستہ پروین اور داماد ابو نصر کو گرفتار کر لیا ہے۔

 

مقتولہ کی شناخت ساجدہ پروین (16) کے طور پر ہوئی ہے۔ ساجدہ کے والد مدشیر کے مطابق ان کی اہلیہ شائستہ پروین کے ابو نصر کے ساتھ گزشتہ پانچ برس سے مبینہ ناجائز تعلقات تھے۔ انہوں نے الزام لگایا کہ شائستہ نے اپنی کم عمر بیٹی کی زبردستی شادی ڈیڑھ سال قبل 35 سالہ ابو نصر سے کرائی تھی، حالانکہ ساجدہ اس شادی کے لیے تیار نہیں تھی۔

 

والد کے مطابق شادی کے بعد بھی شائستہ اور ابو نصر کے تعلقات برقرار رہے۔ ایک موقع پر ساجدہ نے اپنی ماں اور شوہر کو مبینہ طور پر قابلِ اعتراض حالت میں دیکھ لیا تھا، جس کے بعد گھر میں شدید تنازع پیدا ہوگیا۔ ساجدہ مسلسل ان تعلقات کی مخالفت کر رہی تھی اور اپنی ماں کو شوہر سے دور رہنے کا کہتی تھی۔

 

مدشیر نے الزام لگایا کہ اسی تنازع کے باعث شائستہ اور ابو نصر نے مل کر ساجدہ کو راستے سے ہٹانے کی سازش رچی۔ ان کے مطابق پیر کی رات شائستہ نے بتایا کہ ساجدہ کی طبیعت خراب ہے، جس کے بعد وہ داماد کے ساتھ بیٹی کو بے ہوشی کی حالت میں موٹر سائیکل پر لے گئے۔ الزام ہے کہ بعد میں ساجدہ کو شوہر کے گھر لے جا کر تشدد کا نشانہ بنایا گیا، جس سے اس کی موت ہوگئی۔

 

والد کا کہنا ہے کہ موت کے بعد دونوں ساجدہ کی نعش کو واپس گھر لائے اور بیماری سے موت کا دعویٰ کرتے ہوئے جلد تدفین کی کوشش کی، تاہم شک ہونے پر انہوں نے پولیس کو اطلاع دے دی۔

 

ارریہ آر ایس تھانے کے انچارج انکور کمار کے مطابق اطلاع ملتے ہی پولیس نے موقع پر پہنچ کر نعش کو تحویل میں لے لیا اور پوسٹ مارٹم کے لیے روانہ کیا۔ پولیس نے ملزمہ ماں شائستہ پروین اور داماد ابو نصر کو گرفتار کر لیا ہے اور دونوں سے پوچھ گچھ جاری ہے۔

 

پولیس کا کہنا ہے کہ ابتدائی تحقیقات میں ساس اور داماد کے درمیان مبینہ تعلقات کا معاملہ سامنے آیا ہے اور اسی تنازع کے نتیجے میں بیٹی کے قتل کی واردات پیش آنے کا شبہ ہے۔ مزید تحقیقات جاری ہیں۔