درندہ صفت خاتون نے 2 کمسن بچوں کا گلا گھونٹ کر پھانسی لے لی۔حیدرآباد میں دل دہلا دینے والا واقعہ
درندہ صفت خاتون نے 2 کمسن بچوں کا گلا گھونٹ کر پھانسی لے لی۔حیدرآباد میں دل دہلا دینے والا واقعہ
حیدرآباد: رحمت نگر کے علاقے میں ایک دل دہلا دینے والا واقعہ پیش آیا جہاں ایک خاتون نے خاندانی تنازع کی وجہ سے اپنے دو معصوم بچوں پر حملہ کر دیا۔ اس نے مبینہ طور پر دونوں بچوں کا گلا دبا کر قتل کرنے کی کوشش کی اور پھر خود کو پھانسی لگا کر زندگی ختم کر لی۔
پولیس کے مطابق یہ سانحہ جمعہ کی رات (14 مارچ 2026) کو بورابنڈہ پولیس اسٹیشن حدود میں رحمت نگر کے پدما نگر علاقے میں پیش آیا۔ متاثرہ خاتون کا نام ستیہ وانی بتایا جا رہا ہے، جو اپنے شوہر مرلی وینو اور بچوں کے ساتھ رہتی تھی۔ ان کے بیٹے کی عمر (5 سال) اور بیٹی کی عمر ( 2 سال) بتائی گئی ہے۔
ذرائع کے مطابق مرلی وینو اپنے باپ کو ڈائیلاسز کے علاج کے لیے ہاسپٹل لے گیا تھا۔ اس دوران گھر میں موجود ستیہ وانی نے پہلے اپنے دونوں بچوں کا گلا دبا دیا اور اس کے بعد خود پنکھے سے پھانسی لگا لی۔
گلا دبا دینے کی وجہ سے بیٹا موقع پر ہی فوت ہو گیا۔ بیٹی کو شدید زخمی حالت میں فوری طور پر ہسپتال منتقل کیا گیا جہاں اس کی حالت اب بھی تشویشناک بتائی جا رہی ہے۔
بورابنڈہ پولیس نے ابتدائی تفتیش میں اسے خاندانی جھگڑے کا نتیجہ قرار دیا ہے۔ ممکنہ طور پر گھریلو مسائل، ذہنی تناؤ یا دیگر ذاتی وجوہات نے خاتون کو اس انتہائی قدم پر مجبور کیا ہوگا۔ پولیس نے مقام واقعہ سے شواہد اکٹھے کیے ہیں اور مزید تفتیش جاری ہے۔
پوسٹ مارٹم رپورٹ اور خاندان کے افراد کے بیانات کے بعد ہی مکمل تصویر سامنے آ سکے گی۔ معلوم ہوا ہے کہ یہ واقعہ اس دن پیش آیا جس دن اس جوڑے کی شادی کی سالگرہ تھی۔ پولیس نے نعشوں کو پوسٹ مارٹم کے لیے مردہ خانہ منتقل کردیا۔مزید تفصیلات کا انتظار ہے۔
