بالی ووڈ کے مزاحیہ اداکار راج پال یادو کو 3 ماہ کی جیل

ممبئی:بالی ووڈ کے مشہور مزاحیہ اداکار راج پال یادو کو چیک باؤنس کے معاملے میں ایک بار پھر جیل جانا ہوگا۔ دہلی ہائی کورٹ نے انہیں 3 ماہ قید کی سزا سنائی ہے۔ اس کے ساتھ عدالت نے ان پر بھاری جرمانہ بھی عائد کیا ہے۔

 

جمعہ کو دہلی ہائی کورٹ میں اس معاملے کی سماعت ہوئی جہاں عدالت نے نچلی عدالت کے فیصلے کو برقرار رکھتے ہوئے راج پال یادو کی سزا کو برقرار رکھا۔ہائی کورٹ نے چیک باؤنس کے تمام 7 مقدمات میں راج پال یادو کو 3-3 ماہ کی سادہ قید کی سزا سنائی ہے۔ تاہم عدالت نے حکم دیا کہ تمام سزائیں ایک ساتھ چلیں گی اس لیے انہیں مجموعی طور پر صرف 3 ماہ کی سزا ہی کاٹنی ہوگی۔

 

جسٹس سورن کانتا شرما کی بنچ نے راج پال یادو کی جانب سے نچلی عدالت کے فیصلے کے خلاف داخل درخواستیں مسترد کرتے ہوئے سزا برقرار رکھی۔ انھوں نے کہا کہ راج پال یادو کو عدالت میں دیے گئے اپنے تحریری عہد (انڈرٹیکنگ) پر عمل کرنے کے لیے کئی مواقع فراہم کیے گئے لیکن بار بار موقع ملنے کے باوجود انہوں نے اس کی پابندی نہیں کی۔

 

قابل ذکر ہے کہ راج پال یادو نے 2010 میں ’اتہ پتہ لاپتہ‘ کے نام سے ایک فلم بنائی تھی۔ اس فلم کے لیے انہوں نے 5 کروڑ روپے کا قرض لیا تھا تاہم راجپال یادو کا کہنا تھا کہ یہ قرض نہیں بلکہ سرمایہ کاری تھی۔ وہ یہ رقم واپس ادا نہ کر سکے جس کے بعد واجب الادا رقم بڑھ کر 9 کروڑ روپے ہو گئی۔

 

اسی معاملے میں انہوں نے 5 فروری 2026 کو تہاڑ جیل میں خود سپردگی کی تھی۔ اس مشکل وقت میں سونو سود سمیت کئی اداکاروں نے ان کی مدد کی تھی۔