تلنگانہ میں جمعہ 24 جولائی کو تعلیمی ادارے بند رکھنے این ایس یو آئی سمیت کئی طلبہ تنظیموں کی اپیل

نیشنل اسٹوڈنٹس یونین آف انڈیا (این ایس یو آئی) کی تلنگانہ شاخ نے بائیں بازو سے وابستہ کئی طلبہ تنظیموں کے ساتھ مل کر 24 جولائی کو ریاست بھر کے تعلیمی ادارے بند رکھنے (بند) کی اپیل کی ہے۔ یہ احتجاج طلبہ کے جمہوری حقوق پر مبینہ حملوں اور دہلی میں طلبہ کے خلاف پولیس کارروائی کے خلاف کیا جا رہا ہے۔

اس بند کی حمایت اسٹوڈنٹس فیڈریشن آف انڈیا ، آل انڈیا اسٹوڈنٹس فیڈریشن ، پی ڈی ایس یو ، اے آئی ایف ڈی ایس ، اے آئی ایس بی ، اے آئی پی ایس یو سمیت کئی دیگر طلبہ تنظیموں نے بھی کی ہے۔

این ایس یو آئی تلنگانہ کے ریاستی صدر وینکٹ سوامی نے احتجاج کا اعلان کرتے ہوئے کہا کہ یہ بند ملک بھر میں مرکزی حکومت کی تعلیمی پالیسیوں کے خلاف احتجاج کرنے والے طلبہ سے اظہارِ یکجہتی کے لیے منظم کیا جا رہا ہے

۔انہوں نے الزام لگایا کہ دہلی میں احتجاج کے دوران لوک سبھا میں اپوزیشن لیڈر راہول گاندھی کو حراست میں لینا اور طلبہ پر مبینہ لاٹھی چارج کرنا جمہوری اقدار اور پُرامن احتجاج کے آئینی حق پر حملہ ہے۔