ایک اور ہولناک واقعہ.. ایک ہی خاندان کے 3 افراد کو قتل کرنے کے بعد ڈرائیور کی خودکشی
بنگلورو: ایک ہی خاندان کے تین افراد کو ایک ڈرائیور نے انتہائی بے دردی سے کلہاڑی سے کاٹ کر قتل کر دیا۔ یہ چونکا دینے والا واقعہ ہفتے کی صبح کرناٹک کے دارالحکومت بنگلور میں پیش آیا جس سے علاقے میں سنسنی پھیل گئی۔
ایک 34 سالہ شخص نے اپنی ماں، نانی اور بہنوئی کو ہتھیار سے بے دردی سے قتل کرنے کے بعد خود بھی اپنی زندگی کا خاتمہ کر لیا۔ یہ ہولناک واقعہ کاماکشی پالیہ پولیس اسٹیشن کی حدود میں واقع کوٹیگے پالیہ میں پیش آیا۔
پولیس کے مطابق پرشانت (34) نامی شخص پیشے سے ڈرائیور کا کام کرتا تھا۔ معلوم ہوا ہے کہ ہفتے کی صبح ان کی رہائش گاہ پر خاندان کے افراد کے درمیان کوئی جھگڑا ہوا تھا۔
اس دوران شدید غصے میں آکر پرشانت نے گھر میں رکھی کلہاڑی اٹھائی اور اپنی ماں منگلماں، نانی ننجماں اور بہنوئی ستیش پر اندھا دھند حملہ کر کے انہیں موت کے گھاٹ اتار دیا۔جب اسے یقین ہو گیا کہ تینوں خون میں لت پت ہو کر دم توڑ چکے ہیں
تو پرشانت نے بھی اسی گھر میں پھانسی لگا کر خودکشی کر لی۔ اطلاع ملتے ہی کاماکشی پالیہ پولیس نے جائے وقوعہ پر پہنچ کر نعشوں کو پوسٹ مارٹم کیلئے مردہ خنہ منتقل کردیا۔
پولیس نے معاملہ درج کر کے اس ہولناک قتل عام کی اصل وجوہات جاننے کے لیے تحقیقات شروع کر دی ہیں۔
