شوہر کو برہنہ تصاویر دکھا دینے کی دھمکیاں۔ بلیک میل کرنے والے شخص کے خلاف حیدرآباد میں کیس درج

حیدرآباد: حیدرآباد کی پوچارم آئی ٹی کاریڈور پولیس نے ایک شخص کے خلاف مقدمہ درج کیا ہے جس پر الزام ہے کہ اس نے ایک خاتون کی برہنہ تصاویر اس کے شوہر کو دکھانے کی دھمکی دے کر اسے ہراساں کیا۔

 

پولیس کے مطابق 34 سالہ متاثرہ خاتون انفوسس پوچارم کیمپس میں سیکیورٹی گارڈ کے طور پر کام کرتی ہیں۔ دورانِ ملازمت ان کی ہیڈ سیکیورٹی گارڈ رمیش سے جان پہچان ہوئی جو بعد میں قریبی تعلقات میں تبدیل ہوگئی۔

 

شکایت کے مطابق رمیش نے خاتون کی معلومات کے بغیر اس کی برہنہ تصاویر حاصل کیں اور بعد میں وہی تصاویر اسے دکھائی۔ خاتون نے خوف کے باعث اس بارے میں اپنے شوہر کو کچھ نہیں بتایا

 

کیونکہ انہیں اندیشہ تھا کہ اس سے ان کی ازدواجی زندگی متاثر ہو سکتی ہے۔پولیس کے مطابق رمیش نے خاتون کو فون کر کے مبینہ طور پر دھمکی دی کہ اگر وہ اس کے ساتھ تعاون نہیں کریں گی تو وہ یہ نجی تصاویر ان کے شوہر کو دکھا دے گا۔

 

اس کے بعد متاثرہ خاتون نے جمعرات کو پولیس سے رجوع کرتے ہوئے باضابطہ شکایت درج کرائی جس پر پوچارم آئی ٹی کاریڈور پولیس نے مقدمہ درج کر کے تحقیقات شروع کر دی ہیں۔