’ایس آئی آر‘ کے ذریعہ تلنگانہ کے ایک کروڑ ووٹ کاٹ دینے کی سازش: چیف منسٹر تلنگانہ

حیدرآباد ۔ تلنگانہ کے وزیراعلیٰ ریونت ریڈی نے شدید برہمی کا اظہار کرتے ہوئے الزام عائد کیا کہ ’SIR‘ کے نام پر مخالف ووٹوں کو حذف کیا جا رہا ہے۔ انہوں نے کہا کہ تلنگانہ میں ایک کروڑ ووٹوں کو حذف کرنے کی سازش کی جا رہی ہے۔

 

وزیراعلیٰ نے برہمی کا اظہار کرتے ہوئے کہا کہ دیہات میں رہنے والے لوگوں کے ووٹ بھی حذف کیے جا رہے ہیں۔ آج (پیر) رویندر بھارتی میں کامریڈ سارام پلی ملا ریڈی کی یاد میں ایک تعزیتی تقریب منعقد ہوئی۔ وزیراعلیٰ ریونت ریڈی نے اس تقریب میں بطور مہمانِ خصوصی شرکت کی۔ انہوں نے سارام پلی ملا ریڈی کی تصویر پر پھول چڑھا کر خراجِ عقیدت پیش کیا۔

 

اس موقع پر خطاب کرتے ہوئے وزیراعلیٰ ریونت ریڈی نے الزام لگایا کہ ان کے اپنے حلقۂ انتخاب میں ہی 80 ہزار ووٹ حذف کرنے کی کوشش کی جا رہی ہے۔وزیراعلیٰ نے بی جے پی قائدین کو تنقید کا نشانہ بناتے ہوئے کہا کہ وہ بہار اور بنگال کے طریقۂ کار کو استعمال کرنے کی بات کر رہے ہیں اور بی جے پی کے قائدین بے خوف ہو کر ایسے بیانات دے رہے ہیں۔

 

انہوں نے سوال کیا کہ بی آر ایس، ’SIR‘ کے خلاف ایک لفظ بھی کیوں نہیں بول رہی؟ ریونت ریڈی نے کہا کہ ان ہی ووٹوں کے ذریعے 2029 میں نریندر مودی کی شکست کی بنیاد رکھی جائے گی۔ انہوں نے عوام سے اپیل کی کہ ووٹوں کے حذف کیے جانے کے معاملے میں سبھی لوگ چوکس اور محتاط رہیں۔

 

وزیراعلیٰ نے نریندر مودی پر تنقید کرتے ہوئے انہیں ملک کے لیے انتہائی خطرناک شخص قرار دیا۔ ریونت ریڈی نے کہا کہ مودی کی شکست ہی کمیونسٹوں کی جیت ہے۔