حیدرآباد  میں گھر کی واشنگ مشین پھٹنے سے آتشزدگی، فائر عملہ 55 منٹ بعد پہنچا

حیدرآباد کے منی کونڈا میں گولڈن ٹیمپل کے قریب تیروملا ہلز میں ایک گھر کی واشنگ مشین اچانک پھٹ گئی، جس کے بعد گھر میں زبردست آگ بھڑک اٹھی۔

 

مقامی افراد کے مطابق واقعہ کی اطلاع فوری طور پر فائر عملہ کو دی گئی، لیکن فائر اہلکاروں کو جائے حادثہ تک پہنچنے میں تقریباً 55 منٹ لگ گئے۔ تاخیر کی وجہ پوچھنے پر فائر عملہ نے بتایا کہ وہ فنانشل ڈسٹرکٹ سے آنے کی وجہ سے دیر ہوئی۔

 

مقامی عوام نے سوال کیا کہ فلم نگر یا گولکنڈہ سے فائر عملہ کیوں نہیں پہنچا؟ اس پر اہلکاروں نے حدود کا مسئلہ ہونے کی بات کہی۔ فائر عملہ نے واضح کیا کہ منی کونڈا علاقہ گچی باؤلی فائر اسٹیشن کے دائرہ اختیار میں آتا ہے۔

 

عوام نے برہمی کا اظہار کرتے ہوئے کہا کہ اگر اس دوران گھر مکمل طور پر جل جاتا اور جانی یا مالی نقصان ہوتا تو اس کی ذمہ داری کس پر عائد ہوتی؟

 

مقامی عوام نے اعلیٰ عہدیداروں سے مطالبہ کیا کہ فائر سروس کے دائرہ اختیار سے متعلق قواعد کا فوری جائزہ لیا جائے اور ایسے انتظامات کئے جائیں کہ حدود کی پابندی کے بجائے جائے حادثہ کے قریب موجود فائر فائٹرز فوری طور پر موقع پر پہنچ سکیں۔