ریل کے جنون میں موت کا کھیل — تیز رفتار اسٹنٹ کے دوران 3 نوجوان ٹرک سے ٹکرا کر ہلاک، لائیو ویڈیو وائرل
مدھیہ پردیش کے مئوگنج ضلع میں سوشل میڈیا کے لئے ریلز بنانے کے جنون میں ایک اور خوفناک حادثہ پیش آیا جہاں تیز رفتار موٹر سائیکل سے اسٹنٹ اور ویڈیو شوٹنگ کے دوران تین دوست ٹرک سے ٹکرا گئے اور موقع پر ہی ہلاک ہوگئے۔ اس دل دہلا دینے والے حادثے کا لائیو ویڈیو بھی سامنے آیا ہے۔
تفصیلات کے مطابق یہ واقعہ 14 اپریل کو تھانہ علاقے میں پیش آیا، جب پلسیَر 220 موٹر سائیکل پر سوار تین نوجوان تیز رفتاری سے سڑک پر ریلز بنا رہے تھے۔ حادثے میں شبھم کوول (17)، امریش کوول (22) اور ہیمراج کوول (17) موقع پر ہی دم توڑ گئے۔ تمام نوجوان بیلا لاؤر کے رہائشی تھے۔
چشم دید گواہوں کے مطابق موٹر سائیکل کی رفتار 100 سے 120 کلومیٹر فی گھنٹہ کے درمیان تھی۔ نوجوان ٹرکوں کے درمیان سے خطرناک انداز میں موٹر سائیکل گزار رہے تھے اور اس دوران ہاتھ میں پستول نما لائٹر لہراتے ہوئے ریلز بنا رہے تھے۔
اسی دوران پیچھے آنے والی دوسری موٹر سائیکل پر سوار پرشانت دویدی (19) اور پردیپ دویدی (17) اس خطرناک مناظر کی ویڈیو بنا رہے تھے۔ اوورٹیک کرنے کی کوشش میں موٹر سائیکل کا توازن بگڑ گیا اور وہ سڑک کنارے کھڑے ٹرک سے ٹکرا گئی، جس کے نتیجے میں تینوں نوجوان موقع پر ہی ہلاک ہو گئے۔
حادثے کے بعد پیچھے آنے والی دوسری موٹر سائیکل بھی ٹکرا کر حادثے کا شکار ہو گئی، جس میں سوار دونوں نوجوان شدید زخمی ہو گئے۔ انہیں فوری طور پر اسپتال منتقل کیا گیا جہاں ان کا علاج جاری ہے۔
پولیس کے مطابق واقعے کی ویڈیو سوشل میڈیا پر وائرل ہو رہی ہے، جس نے عوام میں شدید غم و غصے اور تشویش کی لہر دوڑا دی ہے۔ حکام نے معاملے کی تحقیقات شروع کر دی ہیں۔
