نیوزی لینڈ کے خلاف ٹی 20 کے دوسرے میچ میں ٹیم انڈیا کی کامیابی

حیدرآباد _ 29 جنوری ( اردولیکس ڈیسک) دوسرے T20 میں ٹیم انڈیا نے 6 وکٹوں سے جیت حاصل کی۔ بھارتی ٹیم نے 100 رنز کا ہدف 19.5 اوورز میں 4 وکٹوں کے نقصان پر پورا کر لیا۔ سوریہ کمار یادیو نے 26، ایشان کشن نے 19 رنز، ہاردک پانڈیا نے 15 اور راہول ترپاٹھی نے 13 رنز بنائے۔ نیوزی لینڈ کے باؤلرز میں بریس ویل اور ایش سودھی نے ایک ایک وکٹ حاصل کی۔ اس جیت کے ساتھ ہی ہندوستان نے تین میچوں کی ٹی ٹوئنٹی سیریز 1-1 سے برابر کر دی۔ فائنل میچ یکم فروری کو کھیلا جائے گا۔

اس سے قبل ٹاس جیت کر بیٹنگ کرنے والی نیوزی لینڈ نے بھارتی گیند بازوں کے خلاف 99 رنز بنائے۔ نیوزی لینڈ جس نے اپنی پہلی وکٹ 21 رنز پر گنوائی، ہندوستانی گیند بازوں کی وجہ سے لگاتار وکٹیں گنواتی رہی۔ اس تسلسل میں نیوزی لینڈ نے صرف 60 رنز پر اپنی آدھی وکٹیں گنوا دیں ۔ اس وقت بریس ویل اور سینٹنر نے کچھ دیر کے لیے وکٹیں گرنے سے روکا۔ انہوں نے سنگلز لیتے ہوئے اسکور بورڈ کو آگے بڑھایا ۔ اسی تسلسل میں چھٹی وکٹ پر 20 رنز کا اضافہ ہوا۔ لیکن ہاردک پانڈیا نے بریس ویل کو آؤٹ کیا جنہوں نے 14 رنز بنائے۔ اس کے بعد ایک بار پھر نیوزی لینڈ کی وکٹیں گریں۔ آخر میں نیوزی لینڈ نے 20 اوورز میں 8 وکٹوں پر 99 رنز بنائے۔ ہندوستانی گیند بازوں میں ارش دیپ سنگھ نے دو وکٹیں ۔پانڈیا، سندر، چاہل، ہڈا، کلدیپ یادیو نے ایک ایک وکٹ حاصل کی۔