آسٹریا کے شہر ویانا میں بتکماں اور دسہرہ کی تقریبات کا شاندار انعقاد

 

ویانا، آسٹریا: تلگو سنگم آسٹریا کے زیر اہتمام17 اکتوبر کو صدرنشین شریمتی شری لتا کومٹ ریڈی اور ایگزیکٹیو کمیٹی کے ارکان کے اشتراک سے بتکما اور دسہرہ کی تقریبات جوش و خروش کے ساتھ منعقد کی گئیں۔ آسٹریا میں مقیم تلگو خاندانوں نے بڑی تعداد میں شرکت کرتے ہوئے روایتی انداز میں بتکما منایا اور دسہرہ کا تہوار خوشی و مسرت کے ساتھ منایا۔

 

بیرون ملک تلگو تہذیب و ثقافت اور روایات کے تحفظ کے مقصد سے منعقدہ اس پروگرام میں خواتین نے بتکما کے روایتی گیتوں اور رقص کے ذریعہ محفل کو رنگا رنگ بنایا، جبکہ بچوں اور نوجوانوں نے ثقافتی پروگراموں میں جوش و خروش سے حصہ لیا۔ روایتی تلگو پکوانوں پر مشتمل اجتماعی ضیافت، موسیقی کے پروگرام اور لکی ڈرا تقریب کے اہم پرکشش پہلو رہے۔

 

تقریب کی کامیابی میں تلگو سنگم آسٹریا کی ایگزیکٹیو کمیٹی، رضاکاروں، آرائش اور رجسٹریشن ٹیموں کے علاوہ اراکین نے مشترکہ طور پر اہم کردار ادا کیا۔ اسپانسرز اور بہی خواہوں کے تعاون سے بھی پروگرام کو کامیاب بنانے میں مدد ملی۔

 

اس موقع پر صدرنشین شری لتا کومٹ ریڈی نے کہا کہ بیرون ملک قیام کے باوجود تلگو تہذیب و ثقافت اور روایات کو نئی نسل تک منتقل کرنا اور تلگو برادری کو ایک خاندان کی طرح متحد رکھنا تنظیم کا بنیادی مقصد ہے۔ انہوں نے تعاون کرنے والے اراکین، ایگزیکٹیو کمیٹی، رضاکاروں اور اسپانسرز سے اظہار تشکر کیا۔

 

’’مل کر کام کیا، مل کر جشن منایا اور مل کر خوشگوار یادیں تخلیق کیں‘‘ کے جذبے کے ساتھ تقریبات کا اختتام ہوا۔ تلگو سنگم آسٹریا نے بیرون ملک تلگو تہذیب و ثقافت کے تحفظ اور فروغ کے لیے اپنی سرگرمیاں جاری رکھنے کے عزم کا اظہار کیا۔