بی جے پی امیدوار کے پرچہ نامزدگی پر تنازعہ،کانگریس، بی ایس پی کی شکایت۔ پرچہ نامزدگی مسترد کرنے کا مطالبہ
نمئندہ خصوصی خضر احمد یافعی کی رپورٹ
عادل آباد/عادل آباد کانگریس پارٹی اسمبلی انچارج کندی سری نواس ریڈی نے متعلقہ عہدیداروں سے کہا ہے کہ وہ الیکشن کمیشن کے قوائد کے مطابق عادل آباد حلقہ پارلیمنٹ بی جے پی امیدوار گیڈم ناگیش کے پرچہ نامزدگی کو مسترد کردیں۔انہوں نے الیکشن ریٹرننگ آفیسر سے شکایت کرنے کے بعد کلکٹریٹ میں میڈیا سے بات کی۔
آپ کو بتادیں کہ گیڈم ناگیش پر الزام ہے کہ انہوں اپنی اہلیہ کے اثاثوں کی تفصیلات پرچہ نامزدگی میں درج نہیں کی ہیں۔وہ جگہ ادھوری چھوڑ دی گئی ہے۔یہ اطلاع عام ہوتے ہی مختلف سیاسی جماعتوں کے قائدین نے احتجاج درج کروایا اور گیڈم نگیش کی پرچہ نامزدگی کو مسترد کرنے کا مطالبہ کیا۔انہون نے عہدیداروں سے جواب دینے اور فوری طور پر ان کے کاغذات نامزدگی کو مسترد کرنے کا مطالبہ کیا۔اس دوران کانگریس اور بی ایس پی نے کلکٹریٹ میں دھرنا بھی دیا۔کندی سرینواس ریڈی نے پر ہجوم میڈیا سے بات کرتے ہوئے کہا کہ حکام کو قواعد کے مطابق کام کرنا چاہیے اور کسی بھی سیاسی پارٹی کی طرفداری نہیں کرنی چاہیے۔انہوں نے واضح کیا کہ وہ اس معاملہ کو کانگریس اعلیٰ قیادت اور لیگل ایڈوائزر کی نوٹس میں لا چکے ہیں اور اس اہم مددے پر قانونی جنگ لڑنے کے لیے بھی تیار ہیں۔اس کے لئے عدالت عظمیٰ کا بھی دروازہ کھٹکھٹایا جائے گا۔
دریں اثناء کندی سرینواس ریڈی نے میڈیا سے مخاطب کے دوران ضلع ریٹرننگ آفیسر پر مرکزی حکومت کے دباؤ میں آکر گیڈم نگیش کی حمایت میں خاموش اختتار کرنے اور غیر محسوس طریقہ سے گیڈم نگیش کا تعاون کرنے کا بھی الزام عائد کیا۔انہوں نے ڈسٹرکٹ الیکشن ریٹرننگ آفیسر اور کلکٹر سے اس سلسلہ میں فوری جواب طلب کیا ہے۔
