امریکہ میں سڑک حادثہ، حیدرآباد کے ایک ہی خاندان کے تین افراد جاں بحق

حیدرآباد کے سعیدآباد سے تعلق رکھنے والے ایک خاندان کے تین افراد امریکہ کی ریاست کیلیفورنیا کے سالٹن سٹی میں پیش آئے ایک المناک سڑک حادثے میں جاں بحق، جبکہ دو افراد زخمی ہوگئے۔

 

متوفیوں کی شناخت 45 سالہ نازیہ سلمیٰ، ان کی 19 سالہ بیٹی حافظہ نہا شیخ اور 14 سالہ بیٹے حافظ عمر کے طور پر ہوئی ہے۔

 

حادثے میں نازیہ کے شوہر شیخ عبدالنویڈ، جو حیدرآباد میں تقریباً ایک دہائی تک ڈاکٹر ریڈی لیبارٹریز میں سائنسداں کے طور پر خدمات انجام دے چکے ہیں، اور ان کی سات سالہ بیٹی خدیجہ شیخ زخمی ہوئے ہیں۔ دونوں اس وقت کیلیفورنیا کے ایک اسپتال میں زیر علاج ہیں۔

 

حادثے کی خبر ملتے ہی حیدرآباد کے سعید آباد میں واقع خاندان کے آبائی علاقے میں رشتہ داروں اور عزیز و اقارب کی بڑی تعداد جمع ہوگئی اور اہل خانہ سے تعزیت کا اظہار کیا۔

 

صدر کل ہند مجلس اتحاد المسلمین و رکن پارلیمنٹ حیدرآباد بیرسٹر اسدالدین اویسی اور فلور لیڈر اکبرالدین اویسی کی ہدایت پر یاقوت پورہ کے رکن اسمبلی جعفر حسین معراج نے سعید آباد کالونی کے رہنے والے شیخ نوید کے گھر والوں سے ملاقات کی اور کیلیفورنیا، امریکہ میں پیش آئے المناک سڑک حادثے پر گہرے رنج و غم کا اظہار کیا اور گھر والوں سے تعزیت کا اظہار کیا۔

 

خاندانی ذرائع کے مطابق جاں بحق افراد کی تدفین 24 جولائی کو امریکہ میں ہی کیے جانے کا امکان ہے۔ تاہم حادثے کی وجوہات اور دیگر تفصیلات فوری طور پر سامنے نہیں آسکی ہیں۔