غزہ پر مودی حکومت کی خاموشی ہندوستان کی اخلاقی ساکھ کو نقصان پہنچا رہی ہے: سونیا گاندھی

کانگریس کی سابق صدر سونیا گاندھی نے ہفتہ کے روز وزیر اعظم نریندر مودی کی قیادت والی مرکزی حکومت کو غزہ میں اسرائیلی فوجی کارروائیوں پر "سنگین خاموشی” اختیار کرنے پر سخت تنقید کا نشانہ بنایا۔ انہوں نے کہا کہ اس معاملے پر ہندوستان کا موجودہ مؤقف نہ صرف ملک کی اخلاقی ساکھ بلکہ اس کے اسٹریٹجک مفادات کو بھی نقصان پہنچا رہا ہے۔

 

سونیا گاندھی نے کہا کہ غزہ میں بڑھتے ہوئے انسانی بحران، شہری ہلاکتوں اور وسیع پیمانے پر تباہی کے باوجود ہندوستان کی جانب سے کوئی مؤثر ردعمل سامنے نہیں آیا، جبکہ عالمی سطح پر اس پر شدید تشویش کا اظہار کیا جا رہا ہے۔

 

انہوں نے مقبوضہ فلسطینی علاقوں سے متعلق اقوام متحدہ کی حالیہ رپورٹ کا حوالہ دیتے ہوئے کہا کہ اس میں غزہ میں بڑے پیمانے پر تباہی، بچوں اور شہری بنیادی ڈھانچے کو نشانہ بنانے کی تفصیلات درج ہیں۔

 

سونیا گاندھی نے لکھا کہ”یہ رپورٹ نہایت دل دہلا دینے والی ہے، جو غزہ میں تباہی کی شدت اور معصوم شہریوں، خصوصاً بچوں کی تکالیف کو واضح کرتی ہے۔” انہوں نے کہا کہ تنازع کے آغاز سے اب تک مبینہ طور پر 20 ہزار سے زائد بچے جاں بحق اور ہزاروں زخمی ہو چکے ہیں۔

 

انہوں نے 7 اکتوبر 2023 کو حماس کی جانب سے اسرائیل پر کیے گئے حملے کو "ہولناک” اور "ناقابل قبول” قرار دیتے ہوئے اس کی مذمت کی، تاہم کہا کہ اسرائیل کا جوابی حملہ ہر حد سے تجاوز کر چکا ہے۔

 

سونیا گاندھی نے کہا کہ”اسرائیل کی جوابی کارروائی اندھی سفاکی اور بربریت کی مثال بن گئی ہے۔” انہوں نے اسرائیلی وزیر اعظم بنیامن نیتن یاہو سمیت اسرائیلی قیادت پر ایسے بیانات دینے کا الزام عائد کیا جو ان کے بقول "نسل کشی کے ارادے” کی عکاسی کرتے ہیں۔

 

انہوں نے سوال کیا کہ فلسطین کی تاریخی حمایت کرنے والا ہندوستان آج اس معاملے پر خاموش کیوں ہے۔ ان کا کہنا تھا، "ہندوستان خاموشی کی واحد آواز بن کر رہ گیا ہے۔” انہوں نے الزام لگایا کہ اقوام متحدہ کی تازہ رپورٹ سامنے آنے کے بعد بھی مودی حکومت نے کوئی ردعمل ظاہر نہیں کیا۔

 

سونیا گاندھی نے کہا کہ ہندوستان کی روایتی خارجہ پالیسی نوآبادیاتی نظام کی مخالفت، قومی خودمختاری اور امن کے اصولوں پر قائم تھی، لیکن موجودہ حکومت اس ورثے کو کمزور کر رہی ہے۔ ان کے بقول، "آج فلسطینی عوام کے دکھ درد کے معاملے میں ہندوستان کی بے حسی اسے دنیا سے الگ اور غیر معمولی بنا رہی ہے۔”