تلنگانہ کے کئی اضلاع میں آج موسلادھار بارش کا امکان، محکمہ موسمیات کا یلو الرٹ
تلنگانہ کے کئی اضلاع میں آج موسلادھار بارش کا امکان، محکمہ موسمیات کا یلو الرٹ
حیدرآباد: تلنگانہ میں مانسون ایک بار پھر سرگرم ہوگیا ہے اور جمعرات کو ریاست کے کئی اضلاع میں موسلادھار بارش کا امکان ظاہر کیا گیا ہے۔ محکمۂ موسمیات کے مطابق شمالی تلنگانہ کے مختلف علاقوں میں شدید بارش ہوسکتی ہے، جس کے پیش نظر متعلقہ اضلاع کے لیے یلو الرٹ جاری کیا گیا ہے۔
محکمۂ موسمیات نے بتایا کہ متحدہ عادل آباد، کریم نگر اور کھمم اضلاع میں بعض مقامات پر موسلادھار بارش ہونے کا امکان ہے، جبکہ نظام آباد، جئے شنکر بھوپال پلی اور مولوگو اضلاع میں ہلکی سے معتدل بارش ہوسکتی ہے۔ کئی علاقوں میں گرج چمک کے ساتھ بارش اور تیز ہوائیں چلنے کی بھی پیش قیاسی کی گئی ہے۔
محکمۂ موسمیات نے عوام کو خراب موسم کے دوران احتیاط برتنے کا مشورہ دیا ہے۔ خاص طور پر بجلی کی گرج چمک کے وقت کھلے مقامات، درختوں اور برقی کھمبوں کے قریب جانے سے گریز کرنے کی ہدایت کی گئی ہے۔
شدید بارش کے باعث نشیبی علاقوں میں پانی جمع ہونے اور بعض مقامات پر آمدورفت متاثر ہونے کا بھی امکان ہے۔ متعلقہ محکمہ جات کو بھی صورتحال پر نظر رکھنے اور ضرورت پڑنے پر فوری اقدامات کرنے کی ہدایت کی گئی ہے۔
