دھوکہ سے ہندوستانی نوجوانوں کو روسی فوج میں بھرتی کرنے والے ایجنٹوں کے خلاف کارروائی کرنے شیخ عبداللہ سہیل کا مطالبہ

حیدرآباد، 23 فروری ( پریس نوٹ) سینئر بی آر ایس لیڈر شیخ عبداللہ سہیل نے مرکزی اور ریاستی حکومتوں سے مطالبہ کیا کہ وہ ان ایجنٹوں کے خلاف فوری کارروائی کریں جنہوں نے دھوکہ دہی سے ہندوستانی نوجوانوں کو روسی فوج میں معاون عملہ کے طور پر بھرتی کیا۔

 

انھوں نے کہا کہ جنوری کے دوسرے ہفتے میں روس-یوکرین جنگ کے علاقے میں پھنسے ہوئے ہندوستانی نوجوانوں کے بارے میں رپورٹس سامنے آنے کے باوجود، مرکزی حکومت فوری طور پر جواب دینے میں ناکام رہی۔ تقریباً ایک درجن افراد کی شناخت مقامی ایجنٹوں کے شکار کے طور پر کی گئی جنہوں نے ملازمت فراہم کرنے کا بہانہ دھوکہ دہی سے انہیں روس بھیجا تھا ۔ ان متاثرین کے اہل خانہ نے اس ریاکٹ میں ملوث ایجنٹوں کی نشاندہی کی۔ پھر بھی نہ تو مرکزی اور نہ ہی ریاستی حکومت نے اس سلسلے میں کوئی کارروائی کی۔

 

بی آر ایس لیڈر نے جمعہ کو وزارت خارجہ کے ترجمان رندھیر جیسل کے اس بیان کا خیرمقدم کیا، جس سے یہ ظاہر ہوتا ہے کہ ہندوستان روسی فوج کے معاون عملے کے طور پر کام کرنے والے ہندوستانیوں کی جلد ‘اخراج ‘ کے لیے ماسکو سے رابطے میں ہے۔ انہوں نے وزارت خارجہ پر زور دیا کہ وہ روس میں پھنسے نوجوانوں کے خاندانوں کی مدد کے لیے ایک سیل قائم کرے۔ اس سے دوسرے نوجوانوں کے خاندانوں کو بھی حوصلہ ملے گا جو دھوکہ دہی کے ایجنٹوں کا شکار ہو سکتے ہیں۔عبداللہ سہیل نے معصوم نوجوانوں کی زندگیوں کو خطرے میں ڈالنے والے ایکٹ میں ملوث ایجنٹوں کے خلاف فوجداری مقدمات درج کرنے سمیت سخت کارروائی کا مطالبہ کیا۔

 

انہوں نے بتایا کہ اب تک تلنگانہ کے دو نوجوان محمد اسفان اور محمد سفیان روس میں پھنسے ہوئے ہیں۔ انہوں نے ریاستی حکومت سے درخواست کی کہ وہ وزارت خارجہ کے ساتھ ایک مواصلاتی چینل کھولے تاکہ ان کی محفوظ گھر واپسی کو یقینی بنایا جا سکے۔ انہوں نے نوجوانوں پر زور دیا کہ وہ ان ایجنٹوں سے ہوشیار رہیں جو انہیں غیر ممالک میں نوکریوں کا لالچ دینے کی کوشش کرتے ہیں۔