نارائن پیٹ کے درگاہ حضرت سید شاہ محمد تقی سبز پوش قادریؒ کے 4 روزہ سالانہ عرس تقاریب کا 2 اکٹوبر کو جلوس پرچم قادریہ سے آغاز ہوگا
نارائن پیٹ: یکم اکتوبر (اردو لیکس) ریاست تلنگانہ کے سرحدی علاقہ نارائن پیٹ ضلع مستقر کے درگاہ حضرت سید شاہ محمد تقی سبز پوش قادریؒ کے 4 روزہ سالانہ عرس تقاریب کا 2 اکٹوبر کو جلوس پرچم قادریہ سے آغاز ہوگا
اس ضمن میں آج سید شاہ غیاث الدین قادری سجادہ نشین درگاہ تقی بابا رح نے پریس کانفرنس منعقد کرتے ہوئے تفصیلات سے واقف کروایا
۔ ان تقاریب میں ریاست تلنگانہ کے مختلف مقامات کے علاوہ پڑوسی ریاست کرناٹک’ آندھراپردیش’ مہاراشٹر اور گجرات’ ممبئی’ احمد آباد سے تعلق رکھنے والے ہزاروں افراد بلالحاظ مذہب و ملت شرکت کرتے ہیں جنھیں تمام تر بنیادی سہولیات پہنچانے کیلئے سجادہ نشین و معتمدین درگاہ کی زیر نگرانی انتظامات کئے جارہے ہیں۔
عرس پروگرام کے مطابق 2 اکٹوبر بروز جمعرات کو بعد نماز عصر پٹیل ہاؤس روبرو جامع مسجد نارائن پیٹ سے جلوس پرچم قادریہ کا آغاز ہوگا جو قبل مغرب درگاہ شریف پینچ کر اختتام پذیر ہوگا۔ 3 اکٹوبر بروز جمعہ کو بعد نماز عشاء صندل کٹہ سے جلوس صندل برآمد ہوگا۔ جسمیں ہزاروں کی تعداد میں مریدین و معتقدین شرکت کریں گے۔
قبل از فجر رسم صندل مالی سجادہ نشین درگاہ تقی باباؒ سید شاہ غیاث الدین قادری اور جانشین سجادہ حافظ سید محمد تقی رابع عرف مصطفی قادری انجام دیں گے۔ 4 اکٹوبر بروز ہفتہ کو گیارہویں شریف ہو گی۔ اور بعد نماز عشاء احاطہ درگاہ شریف میں محفل نعت منعقد ہوگی۔ 5 اکٹوبر بروز اتوار کو بعد نماز فجر محفل زیارت منعقد ہوگی۔ اس موقع پر عظیم الشان جلسہ عظمت اولیاء منعقد ہوگا
جس کو مہمان خصوصی مولانا سید شاہ عزیز اللّہ قادری سابقہ شیخ المعقولات جامعہ نظامیہ حیدر آباد کے علاوہ مقامی علماء مخاطب فرمائیں گے۔ اور اسی روز بعد نماز عشاء احاطہ درگاہ شریف میں محفل سماع منعقد ہوگی۔ جس میں ذاکر تاجی قوال اینڈ پارٹی حیدرآباد’ ملک الزماں قوال اینڈ پارٹی حیدرآباد نعتیہ ومنقبتی کلام سنائیں گے
۔ عرس شریف کے موقع پر تمام اجلاسوں کی نظامت حافظ محمد چاند پاشاہ لیکچرر انجام دیں گے۔ معتمدین درگاہ الحاج محمد نواز موسی’ الحاج محمد رفیق چاند نے عوام الناس بالخصوص معتقدین سے عرس تقاریب میں شرکت کی خواہش کی ہے۔
