ایم ایس ہیونلی ہارٹس تہنیتی تقریب: 466 یتیم طلبہ و طالبات کی شاندار کامیابیوں کا جشن

حیدرآباد: ایم ایس ایجوکیشن اکیڈیمی کے زیرِ اہتمام ’’ایم ایس ہیونلی ہارٹس‘‘ کے تحت ایس ایس سی اور انٹرمیڈیٹ دوم سال کامیاب ہونے والے 466 یتیم طلبہ و طالبات کے اعزاز میں بھارتیہ ودیا بھون، حیدرآباد میں ایک پُروقار تہنیتی تقریب منعقد ہوئی۔ یہ تقریب ایسے طلبہ کے لیے امید، حوصلے، عزم اور روشن مستقبل کی علامت بنی، جنہوں نے والد کے سایہ سے محرومی اور زندگی کے سخت حالات کے باوجود غیر معمولی کامیابیاں حاصل کیں۔

 

تقریب سے خطاب کرتے ہوئے ایم ایس ایجوکیشن اکیڈیمی کے بانی و چیئرمین محمد لطیف خان نے کہا کہ یہ دن ان کے دیرینہ خواب کی تعبیر ہے، جب ایک بھرے ہوئے آڈیٹوریم میں ایسے بچوں کو دیکھا جا رہا ہے جو اپنی جدوجہد اور کامیابیوں سے پوری قوم کے لیے تحریک بن چکے ہیں۔ انہوں نے بتایا کہ اس سال 135 ایس ایس سی طلبہ اور 331 انٹرمیڈیٹ طلبہ نے شاندار کامیابی حاصل کی، جو مجموعی طور پر 466 ’’ہیونلی ہارٹس‘‘ طلبہ بنتے ہیں۔

 

محمد لطیف خان نے کہا کہ جن بچوں نے تکالیف، محرومیوں اور چیلنجز کے ماحول میں کامیابی حاصل کی، وہی مستقبل میں سماج کے لیے زیادہ مفید ثابت ہوتے ہیں کیونکہ وہ دوسروں کے درد کو بہتر انداز میں سمجھتے ہیں۔ انہوں نے طلبہ کو پیغام دیا کہ وہ اپنی کامیابیوں کو صرف ذاتی ترقی تک محدود نہ رکھیں بلکہ معاشرے کے کمزور طبقات کی مدد اور انسانیت کی خدمت کو اپنی زندگی کا مقصد بنائیں۔ انہوں نے کہا کہ ’’یہ کامیابی صرف آغاز ہے، آپ سب میں وہ صلاحیت موجود ہے کہ آپ مستقبل میں ہزاروں لوگوں کی زندگی بدلنے کا ذریعہ بن سکتے ہیں۔‘‘

 

تقریب کے مہمانِ خصوصی رکنِ پارلیمان جناب بیرسٹر اسدالدین اویسی نے ’’ہیونلی ہارٹس‘‘ اقدام کو ایک مثالی فلاحی منصوبہ قرار دیتے ہوئے کہا کہ ایم ایس ایجوکیشن اکیڈیمی یتیم طلبہ سے صرف ایک تہائی فیس وصول کرتی ہے جبکہ کتابیں اور دو سیٹ یونیفارم مفت فراہم کیے جاتے ہیں، جو ایک عظیم سماجی خدمت ہے۔ انہوں نے انٹرمیڈیٹ ریاستی اول رینکر حفصہ بیگم (997/1000) اور محمد زبیر احمد (993/1000) سمیت تمام کامیاب طلبہ کو مبارکباد پیش کرتے ہوئے کہا کہ ذاتی محرومیوں کے باوجود کامیابی حاصل کرنا غیر معمولی حوصلے اور محنت کا ثبوت ہے۔ جناب اسدالدین اویسی نے کہا کہ یہی طلبہ میں سے کوئی ملک کے وزیرِاعظم، سائنسدان یا بڑے رہنما بن سکتے ہیں۔ انہوں نے طلبہ کو نصیحت کی کہ وہ تعلیم کے ساتھ دین سے مضبوط تعلق قائم رکھیں، اپنے محسنین کو یاد رکھیں اور مستقبل میں دوسروں کے لیے سہارا بنیں۔

 

تقریب کے اختتام پر کامیاب طلبہ و طالبات کی تہنیت و حوصلہ افزائی کی گئی اور انہیں پُرعزم پیغام کے ساتھ رخصت کیا گیا کہ ایم ایس کے ساتھ ان کا تعلق آج ختم نہیں ہو رہا بلکہ یہ ایک نئے سفر کا آغاز ہے۔ اکیڈیمی نے اس عزم کا اعادہ کیا کہ ایم ایس اپنے ان طلبہ کے ساتھ ہر مرحلے پر کھڑی رہے گی تاکہ وہ زندگی کے بڑے خوابوں کو حقیقت میں بدل سکیں۔

 

اس موقع پر مہمان اعزازی وائس چیئرپرمین لارڈس کالج آف انجینرنگ اینڈ ٹکنالوجی سید توصیف احمد نے بھی طلبہ سے خطاب کیا اور انہیں مبارکباد دیتے ہوئے انہیں مشورہ دیا کہ وہ اپنی سونچ وسیع رکھیں اور قومی اہمیت کے حامل اعٰلی تعلیمی اداروں تک رسائی حاصل کرنے کی کوشش کریں۔ ان کے ساتھ جائنٹ سکرٹری لارڈس کالج آف انجینرنگ اینڈ ٹکنالوجی سید تنویر احمد نے بھی تقریب مین شرکت کی اور لارڈس کی جانب سے ہیونلی ہارٹس طلبہ میں تحائف پیش کئے۔ایم ایس ایجوکیشن اکیڈیمی

 

کی وائس چیئرپرسن نزہت خان، منیجنگ ڈائریکٹرز انور احمد اور ڈاکٹر معظم حسین نے بھی ہیونلی ہارٹس طلبہ کو تہنیت پیش کی اور ان کے روشن مستقبل کے لیے نیک تمناؤں کا اظہار کیا۔