جیب میں رکھا اوپو موبائل فون زور دار دھماکے سے پھٹ گیا، نوجوان کی موت، دو کمسن بچے یتیم

مظفر نگر: اترپردیش کے مظفر نگر میں جیب میں رکھا اوپو موبائل فون اچانک زور دار دھماکے سے پھٹنے کے نتیجے میں ایک نوجوان کی موت ہوگئی۔ یہ واقعہ پیر کی شام ضلع ہیڈکوارٹر سے تقریباً 25 کلومیٹر دور بھوپا پولیس اسٹیٹس کے رحمت پور گاؤں میں وہلنا چوک کے قریب پیش آیا۔

 

متوفی کی شناخت وکاس انتل کے طور پر کی گئی ہے، جو اتم شوگر مل میں ٹوکن مین کی حیثیت سے کام کرتے تھے۔ موبائل پھٹنے کے بعد موٹر سائیکل سے گرنے کے باعث ان کے سر، سینے اور ہاتھ سمیت جسم کے مختلف حصوں پر شدید چوٹیں آئیں۔ منگل کی شام علاج کے دوران انہوں نے دم توڑ دیا۔

 

تفصیلات کے مطابق وکاس کے 70 سالہ والد رویندر نے بتایا کہ ان کا بیٹا اکلوتا تھا اور اس کی شادی ہوچکی تھی۔ وکاس کی چھ سالہ بیٹی درشٹی اور تین سالہ بیٹا ہے۔ پیر کے روز وہ اپنی والدہ کو لے کر ماما کے گھر مژرا گاؤں گئے تھے۔ والدہ کو وہاں چھوڑنے کے بعد شام میں موٹر سائیکل پر واپس گھر لوٹ رہے تھے کہ وہلنا چوک کے قریب ان کی شرٹ کی جیب میں رکھا اوپو موبائل اچانک زور دار آواز کے ساتھ پھٹ گیا۔

 

موبائل میں دھماکے کے باعث وکاس کا موٹر سائیکل پر توازن بگڑ گیا اور وہ سڑک پر گر پڑے۔ دھماکے کے علاوہ گرنے سے بھی انہیں سر اور جسم کے دیگر حصوں پر شدید چوٹیں آئیں۔ واقعے کی اطلاع ملتے ہی پولیس موقع پر پہنچ گئی اور مقامی افراد کی مدد سے زخمی نوجوان کو فوری طور پر ہاسپٹل منتقل کیا۔ ان کی حالت تشویشناک ہونے کے باعث ڈاکٹروں نے انہیں دوسرے ہاسپٹل لے جانے کا مشورہ دیا، جس کے بعد افراد خاندان انہیں آروگیہ ہاسپٹل لے گئے۔ تاہم منگل کی رات دیر گئے علاج کے دوران ان کی موت ہوگئی۔

 

وکاس کی موت کی اطلاع گھر پہنچتے ہی خاندان میں کہرام مچ گیا۔ اہلیہ، کمسن بچوں اور ضعیف والدین کا رو رو کر برا حال ہے۔ اچانک پیش آئے اس حادثے نے خاندان کو شدید صدمے سے دوچار کردیا۔