اترپردیش کے سنبھل میں مسجد کے سروے کے خلاف مقامی مسلمانوں کا احتجاج ؛ جھڑپیں ، پتھراؤ – پولیس کا آنسو گیس اور لاٹھی چارج

لکھنؤ ،_ 24 نومبر ،( اردو لیکس ڈیسک) اتر پردیش کے ضلع سنبھل میں اتوار کو ایک مسجد کے سروے کے خلاف شدید جھڑپ ہوئی۔ یہ سروے ایک عدالت کے حکم کے تحت کیا جا رہا تھا، جس میں دعویٰ کیا گیا تھا کہ مغلوں نے ایک مندر کو توڑ کر مسجد تعمیر کی تھی۔

 

سروے ٹیم کے شاہی جامع مسجد پہنچتے ہی سیکڑوں مظاہرین جمع ہو گئے اور سروے کی مخالفت کی۔ صورتحال اس وقت پرتشدد ہو گئی جب ہجوم نے سروے ٹیم اور وہاں موجود پولیس اہلکاروں پر پتھراؤ کیا۔ جامع مسجد کے امام نے مسجد کے اندر سے اعلان کیا

 

اور مظاہرین سے اپیل کی کہ وہ منتشر ہو جائیں، لیکن مظاہرین احتجاج جاری رکھے رہے۔ پولیس کے اعلیٰ افسران نے بھی ہجوم کو سمجھانے کی کوشش کی، لیکن ناکام رہے، اور پتھراؤ کا سلسلہ جاری رہا۔

اتر پردیش پولیس کے اعلیٰ افسر پرشانت کمار نے کہا کہ سروے عدالت کے حکم پر کیا جا رہا ہے، اور چند شرپسندوں نے پتھراؤ کیا ہے۔ پولیس جائے وقوعہ پر موجود ہے اور صورتحال قابو میں ہے۔ پتھراؤ کرنے والوں کی شناخت کرکے ان کے خلاف قانونی کارروائی کی جائے گی۔

 

تشدد کے باوجود، ایڈوکیٹ کمیشن نے سروے مکمل کر لیا۔ ضلع مجسٹریٹ سنبھل، راجندر پینسیا نے کہا کہ سروے کے دوران پورے عمل کی ویڈیو اور تصاویر لی گئیں، اور کمیشن اپنی رپورٹ 29 نومبر کو عدالت میں پیش کرے گا

 

۔ یہ سروے عدالت میں سپریم کورٹ کے وکیل وشنو شنکر جین کی جانب سے داخل شکایت کے بعد کیا گیا، جس میں دعویٰ کیا گیا تھا کہ شاہی جامع مسجد اصل میں ایک مندر تھی۔

 

گزشتہ چند دنوں سے علاقے میں کشیدگی بڑھ گئی تھی، جس کی وجہ سے پولیس کی بھاری نفری تعینات کی گئی اور پانچ سے زیادہ افراد کے اجتماع پر پابندی عائد کر دی گئی

 

۔ اس سے پہلے 19 نومبر کو بھی ایک سروے کیا گیا تھا، جس میں مقامی پولیس اور مسجد کی انتظامیہ کمیٹی کے ارکان موجود تھے۔

 

جین کی شکایت میں دعویٰ کیا گیا کہ مسجد کی جگہ پہلے ہری ہر مندر موجود تھا، جسے مغل بادشاہ بابر نے 1529 میں جزوی طور پر مسمار کر دیا تھا۔

 

وشنو جین اور ان کے والد ہری شنکر جین پہلے بھی عبادت گاہوں سے متعلق تنازعات میں ہندو فریق کی نمائندگی کر چکے ہیں، جن میں گیان واپی-کاشی وشواناتھ تنازعہ بھی شامل ہے۔