رشوت لیتے ہوئے جی ایچ ایم سی کی خاتون عہدیدار رنگے ہاتھوں پکڑی گئیں

حیدرآباد، یکم جولائی (نمائندہ خصوصی) تلنگانہ اینٹی کرپشن بیورو کے عہدیداروں نے گریٹر حیدرآباد میونسپل کارپوریشن کے ایک خاتون عہدیدار کو رشوت لیتے ہوئے رنگے ہاتھوں گرفتار کر لیا۔ یہ کارروائی شہر کے موسی پیٹ سرکل نمبر 23 میں واقع جائیداد ٹیکس شعبہ میں انجام دی گئی۔

ذرائع کے مطابق، سینئر اسسٹنٹ ایم۔ سنیتا پر الزام ہے کہ انہوں نے ایک شہری کی جائیداد میوٹیشن (نام کی منتقلی) کے عمل کو آگے بڑھانے، ضروری دستاویزات کی کارروائی مکمل کرنے اور مکان سے متعلقہ معاملے کو حل کرنے کے لیے  30,000 روپے رشوت طلب کی۔ شکایت موصول ہونے پر اے سی بی نے فوری کارروائی کرتے ہوئے سنیتا کو رشوت لیتے وقت گرفتار کر لیا۔

اے سی بی کے حکام نے بتایا کہ ملزمہ کے خلاف مقدمہ درج کرتے ہوئے مزید تحقیقات شروع کر دی گئی ہیں۔ عہدیداروں نے یہ بھی واضح کیا کہ سرکاری خدمات میں شفافیت کو متاثر کرنے والی کسی بھی غیر قانونی سرگرمی کو ہرگز برداشت نہیں کیا جائے گا۔