حیدرآباد میں ملاوٹ مافیا کے خلاف بڑا کریک ڈاؤن، 100 دن میں 185 مقدمات
حیدرآباد: عوام کی صحت سے کھیلنے والوں کے خلاف سخت کارروائی کرتے ہوئے حیدرآباد پولیس کی خصوصی ایچ فاسٹ ٹیم نے اپنے قیام کے صرف 100 دنوں میں 185 مقدمات درج کرتے ہوئے 121.87 ٹن ملاوٹ شدہ اور مضرِ صحت غذائی اشیاء ضبط کر لیں۔
پولیس نے خبردار کیا ہے کہ غذائی ملاوٹ محض دھوکہ دہی نہیں بلکہ اقدامِ قتل کے مترادف سنگین جرم ہے اور ضرورت پڑنے پر ملاوٹ مافیا کے خلاف پی ڈی ایکٹ کے تحت بھی کارروائی کی جائے گی۔
حیدرآباد سٹی پولیس کے تحت 19 مارچ کو قائم کی گئی خصوصی ٹیم نے جی ایچ ایم سی، محکمہ فوڈ سیفٹی اور ویٹرنری حکام کے اشتراک سے شہر بھر میں مسلسل چھاپے مار کر ملاوٹ کے منظم نیٹ ورک کے خلاف کارروائیاں کیں۔
ان کارروائیوں میں ادرک لہسن کا ملاوٹ شدہ پیسٹ، کیمیکل سے پکائے گئے پھل، ناقص چکن اور گوشت، نقلی چائے کی پتی، ملاوٹ شدہ کھووا، گھی، دہی، پنیر، خشک میوہ جات، اچار اور دیگر غیر معیاری غذائی اشیاء کی بڑی مقدار ضبط کی گئی۔
سب سے زیادہ 55 مقدمات راجندر نگر زون میں درج ہوئے، جبکہ گولکنڈہ، سکندرآباد، چارمینار، شمس آباد، جوبلی ہلز اور خیرت آباد زون میں بھی متعدد کارروائیاں کی گئیں۔
کمشنر پولیس سی وی آنند نے ایچ فاسٹ ٹیم کی کارکردگی کو سراہتے ہوئے بتایا کہ کمشنر آفس کو روزانہ اوسطاً 15 شکایات موصول ہو رہی ہیں۔
انہوں نے شہریوں سے اپیل کی کہ ملاوٹ یا غیر معیاری خوراک کی تیاری اور فروخت کی اطلاع فوری طور پر ڈائل 100 یا H-FAST ہیلپ لائن
8712661212
پر کال یا واٹس ایپ کے ذریعے دیں۔
پولیس نے یقین دلایا کہ اطلاع دینے والوں کی شناخت مکمل طور پر خفیہ رکھی جائے گی۔
