خانقاہ سمیعہ بنگاری گوڑہ میں گیارہویں شریف کا روحانی اجتماع علماء و مشائخ کی شرکت، ذکر و دعا اور لنگرِ عام کا اہتمام

عادل آباد ۔21/اکتوبر (اردو لیکس) الحاج حافظ محمد سمیع قادری چشتی صابری کی زیرِ سرپرستی خانقاہ سمیعہ بنگاری گوڑہ میں گیارہویں شریف کے موقع پر روحانی اجتماع منعقد ہوا۔ بعد نمازِ ظہر مجلسِ ذکر و وعظ کا اہتمام کیا گیا جس میں علمائے کرام، مشائخ عظام اور محبانِ اولیاء کی بڑی تعداد شریک ہوئی۔

اس موقع پر حضرت صادق علی قادری صاحب نے تلاوتِ قرآنِ پاک سے محفل کا آغاز کیا، بعد ازاں حضرت فصاحت علی قادری چشتی صاحب نے بارگاہِ الٰہی میں حمد پیش کی۔ نعتِ رسولِ مقبول ﷺ سید شعیب، سید احمد اور سلمان شیخ نے عقیدت و احترام کے ساتھ پیش کی۔ نظامت کے فرائض خواجہ عماد الدین چشتی صابری نے بحسن و خوبی انجام دیے۔

حضرت مولانا صلاح الدین صاحب جامعہ نظامیہ حیدرآباد نے اپنے بیان میں اولیائے کرام کی تعلیمات اور پیرانِ طریقت کی شان پر روشنی ڈالی۔ خانقاہ سمیعہ کے سجادہ نشین حضرت سید شاہ مبین قادری چشتی صابری نے اختتامی ذکر و دعا فرمائی۔

اجتماع میں خلفائے کرام و مریدین — عبدالنعم صاحب، مرزا بسم اللہ بیگ، سید انور، سید عثمان، عبدالرؤف، ڈاکٹر غوث اور دیگر حضرات — نے شرکت کی۔ مجلس کے بعد لنگرِ عام کا اہتمام کیا گیا۔ نمازِ عصر کے بعد نشانِ مبارک چڑھایا گیا اور عالمِ اسلام کی سلامتی، امن و خوشحالی کے لیے خصوصی دعائیں کی گئیں۔