پسند کی شادی کی ضد مہنگی پڑی – بھائی کے ہاتھوں بہن کا قتل

اترپردیش کے ضلع مظفرنگر میں ایک دل دہلا دینے والا واقعہ پیش آیا جہاں بھائی نے مبینہ طور پر اپنی 20 سالہ بہن کو گلا کاٹ کر قتل کر دیا۔ پولیس کے مطابق مقتولہ ایک نوجوان سے فون پر بات کیا کرتی تھی، جس پر گھر میں اکثر تنازع رہتا تھا۔

شاہ پور پولیس اسٹیشن کے حدود کے آدم پور گاؤں میں اتوار دوپہر بہن عدیبہ اور بھائی عامر کے درمیان اسی معاملے پر تلخ کلامی ہوئی۔ بتایا جاتا ہے کہ عامر نے بہن کو تعلق ختم کرنے کا مشورہ دیا، تاہم وہ اپنے پسندیدہ نوجوان سے شادی پر اڑی رہی۔ اس پر مشتعل ہو کر عامر نے پہلے بہن کو مارا پیٹا اور پھر چاقو سے اس کا گلا کاٹ دیا۔

واردات کے بعد ملزم موقع سے فرار ہو گیا۔ اطلاع ملتے ہی پولیس اور اعلیٰ افسران جائے وقوعہ پر پہنچ گئے اور شواہد جمع کرتے ہوئے لاش کو پوسٹ مارٹم کے لیے روانہ کر دیا۔

مقتولہ کی والدہ نے بتایا کہ عامر نے کمرے کا دروازہ بند کر کے پہلے عدیبہ کو تشدد کا نشانہ بنایا اور بعد ازاں قتل کر دیا۔ ایس ایس پی سنجے کمار ورما نے بتایا کہ مقدمہ درج کر لیا گیا ہے اور فرار ملزم کی گرفتاری کے لیے متعدد ٹیمیں تشکیل دی گئی ہیں۔ پولیس کا کہنا ہے کہ ملزم کو جلد گرفتار کر لیا جائے گا۔