دبئی میں خوفناک حادثہ 7 ہندوستانی ہلاک 9 زخمی
نئی دہلی: متحدہ عرب امارات کے شہر دبئی میں ایک المناک سڑک حادثے میں 7 ہندوستانی شہری ہلاک جبکہ 9 دیگر زخمی ہو گئے۔ یہ حادثہ اس وقت پیش آیا جب مزدوروں کو لے جانے والی ایک منی بس شاہراہ پر کھڑے ایک ٹرک سے
ٹکرا گئی جو مبینہ طور پر تکنیکی خرابی کے باعث سڑک کے درمیان رکا ہوا تھا۔زخمیوں میں پانچ افراد کی حالت تشویشناک بتائی جا رہی ہے جبکہ چار دیگر معمولی زخمی بتائے گئے ہیں۔ تمام زخمیوں کو فوری طور پر اسپتال منتقل
کر دیا گیا جہاں ان کا علاج جاری ہے۔حادثے کے بعد دبئی میں بھارتی قونصل خانہ متحرک ہو گیا اور مقامی حکام کے ساتھ رابطے میں رہتے ہوئے متاثرہ خاندانوں کو ہر ممکن مدد فراہم کر رہا ہے۔ دبئی میں بھارتی قونصل خانے نے تصدیق کی ہے
کہ حادثے میں ہلاک ہونے والوں میں متعدد بھارتی کارکن شامل ہیں اور اس سانحے پر گہرے رنج و غم کا اظہار کیا ہے۔قونصل خانے نے اپنے بیان میں کہا کہ "دبئی میں پیش آنے والے اس افسوسناک سڑک حادثے میں کئی بھارتی
کارکنوں کی جانیں ضائع ہوئیں جس پر ہمیں شدید دکھ ہے۔”حکام نے زخمیوں کی عیادت کے لیے اسپتال کا دورہ بھی کیا اور متاثرہ افراد سے ملاقات کی۔ قونصل خانے کے مطابق تمام ضروری امداد اور تعاون کی فراہمی کے لیے مقامی حکام
کے ساتھ قریبی رابطہ برقرار رکھا جا رہا ہے۔دبئی پولیس کے مطابق حادثہ اس وقت پیش آیا جب ایک منی بس ایک ایسے ٹرک سے جا ٹکرائی جو خرابی کے باعث سڑک پر رکا ہوا تھا۔ٹریفک کے جنرل ڈپارٹمنٹ کے ڈائریکٹر بریگیڈیئر نے بتایا کہ
ابتدائی تحقیقات سے معلوم ہوا ہے کہ ٹرک اچانک فنی خرابی کے سبب سڑک کے درمیان رک گیا تھا۔ ان کے مطابق منی بس ڈرائیور محفوظ فاصلہ برقرار رکھنے میں ناکام رہا اور بروقت ردعمل نہ دے سکا جس کے نتیجے میں منی بس ٹرک کے
پچھلے حصے سے جا ٹکرائی۔حادثے کی مکمل وجوہات جاننے کے لیے ٹریفک حادثات کی تحقیقاتی ٹیموں کو موقع پر تعینات کیا گیا جنہوں نے شواہد جمع کرنے اور حادثے کی تفصیلات کا جائزہ لینے کا کام شروع کر دیا۔بریگیڈیئر نے بتایا کہ
ٹریفک پولیس نے جائے حادثہ پر ٹریفک کی روانی برقرار رکھنے علاقے کو محفوظ بنانے اور امدادی گاڑیوں کی آمد و رفت کو یقینی بنانے کے اقدامات کیے۔ بعد ازاں تباہ شدہ ٹرک اور منی بس کو ہٹا کر شاہراہ پر ٹریفک کی معمول کی روانی بحال
کر دی گئی۔حادثے کے بعد دبئی پولیس نے تمام ڈرائیوروں سے اپیل کی ہے کہ سفر سے قبل اپنی گاڑیوں کی تکنیکی حالت کا اچھی طرح جائزہ لیں اور کسی خرابی ایندھن ختم ہونے یا ٹائر پنکچر ہونے کی صورت میں فعال ٹریفک لین میں
گاڑی کھڑی کرنے سے گریز کریں کیونکہ ایسی صورتحال دیگر سڑک استعمال کرنے والوں کے لیے سنگین خطرات کا باعث بن سکتی ہے۔
