مکتھل میں بی آر ایس کا ’سمرا بھیری‘ احتجاج، کانگریس حکومت پر وعدوں کی تکمیل میں ناکامی کا الزام

مکتھل میں بی آر ایس کا ’سمرا بھیری‘ احتجاج، کانگریس حکومت پر وعدوں کی تکمیل میں ناکامی کا الزام

 

مکتھل، 2 ستمبر (اردو لیکس): کانگریس حکومت کی ایک ہزار روزہ حکمرانی کو ناکام قرار دیتے ہوئے بی آر ایس کی جانب سے مکتھل میں ’سمرا بھیری‘ احتجاجی پروگرام منعقد کیا گیا۔ سابق رکن اسمبلی چٹّیم رام موہن ریڈی کی قیادت میں بی آر ایس قائدین اور کارکنوں نے حکومت کے خلاف احتجاجی ریالی نکالی۔

 

ریالی نلّہ جانمّا مندر سے امبیڈکر چوراستہ تک نکالی گئی، جس میں بڑی تعداد میں بی آر ایس کارکنوں نے شرکت کی۔ کارکنوں نے ہاتھوں میں فلیکسیاں اور کانگریس کے انتخابی وعدوں سے متعلق 420 وعدوں کے کارڈس تھام کر حکومت کے خلاف نعرے لگائے اور وعدوں کی تکمیل کا مطالبہ کیا۔

 

اس موقع پر بی آر ایس قائدین نے الزام عائد کیا کہ کانگریس نے انتخابات کے دوران عوام سے بڑے پیمانے پر وعدے کئے، لیکن اقتدار میں آنے کے بعد ان کی تکمیل میں ناکام رہی۔ انہوں نے کہا کہ حکومت کی ناکامیوں اور عوامی مسائل کو اجاگر کرنے کے لئے احتجاج کیا گیا ہے۔

 

چٹّیم رام موہن ریڈی نے کہا کہ عوام سے کئے گئے وعدوں کی تکمیل حکومت کی ذمہ داری ہے۔ انہوں نے کہا کہ وعدوں کی عدم تکمیل کے خلاف بی آر ایس عوام کے درمیان رہتے ہوئے مسلسل جدوجہد کرے گی اور حکومت پر وعدوں کی تکمیل کے لئے دباؤ ڈالے گی۔

 

احتجاج میں بی آر ایس کے اہم قائدین، عوامی نمائندے، کارکنان اور پارٹی کے حامیوں کی بڑی تعداد موجود تھی۔