جرائم و حادثات

لکھنؤ میں 11 سالہ بچی کے ساتھ ایک سال تک مبینہ زیادتی، ویڈیو بناکر بلیک میل کرنے والا قاری عمران گرفتار

لکھنؤ: اترپردیش کے دارالحکومت لکھنؤ کے علاقے سعادت گنج میں 11 سالہ کمسن لڑکی کے ساتھ تقریباً ایک سال تک مبینہ جنسی زیادتی اور ویڈیو کے ذریعہ بلیک میل کرنے کے الزام میں پولیس نے قاری عمران کو گرفتار کرلیا۔ ملزم منصور نگر کی ایک مسجد میں بچوں کو قرآن مجید کی تعلیم دیتا تھا۔ الزام ہے کہ وہ تعلیم دینے کے بہانے بچی کو الگ لے جاکر اس کا جنسی استحصال کرتا تھا۔ اس دوران اس نے مبینہ طور پر ویڈیو بھی بنالی اور اسے منظر عام پر لانے کی دھمکی دے کر خاموش رہنے پر مجبور کرتا رہا۔ بعض مقامی ذرائع کے مطابق ملزم مسجد کے علاوہ اپنے گھر میں بھی بچی کو نشانہ بناتا تھا۔

 

مقامی میڈیا رپورٹس کے مطابق، معاملہ اس وقت سامنے آیا جب چائلڈ لائن کو اس سلسلے میں خفیہ اطلاع موصول ہوئی۔ ابتدائی تحقیقات اور شواہد حاصل کرنے کے بعد چائلڈ لائن نے سعادت گنج پولیس کو اطلاع دی۔ دوسری رپورٹوں میں بچی کے والد کی شکایت کو مقدمہ درج ہونے کی بنیاد بتایا گیا ہے۔ پولیس نے پوکسو ایکٹ اور دیگر متعلقہ فوجداری دفعات کے تحت مقدمہ درج کرکے ملزم کو گرفتار کرلیا۔

 

مقامی ذرائع ابلاغ کی ایک رپورٹ کے مطابق ملزم کی عمر 27 سال بتائی گئی ہے اور اسے پولیس نے بلّاکی اڈہ کے قریب سے گرفتار کیا۔ پولیس اب ملزم کے موبائل فون، مبینہ ویڈیو اور دیگر برقی شواہد کی جانچ کررہی ہے۔ تفتیشی ایجنسیاں اس پہلو کی بھی جانچ کررہی ہیں کہ آیا ملزم نے دیگر کمسن بچوں کو بھی اپنا نشانہ بنایا ہے یا نہیں۔ متاثرہ بچی کو ضروری مدد اور مشاورت فراہم کرنے کی کارروائی بھی کی جارہی ہے۔

 

متعلقہ خبریں

Back to top button